Alimyon sa Kalipay (Kand Don)

Alas sayis sa hapon, Sabado

didto sa Cagayan de Oro,

nangluspad ang ngabil sa adlaw.

Gikawras sa mga bituon

ang aping sa langit.

Giliyok-liyok ang buwan

sa panit sa kangitngit.

Ug sa dihang nilayag nako sa barko.

Nakalimot ko nga wa naman diay laba

kining akong sinina sukad gikamit

ko ni didto sa Timoga.

Ug kalit lang, nakighagwa ang mga lakrang

katawa nga namilit niining panaptona,

diri nahisayran ko nga ang kalipay

adunay alimyon, ug kini nisuksok

sa suok sa akong kasingkasing.

Apan kalit lang pod gikusokuso sa kabugnaw

sa hangin ang akong paghandom.

Dayon kini gihumol sa akong paglantaw

sa nagbuwang dagat hangtud giwaswasan

kini sa mga tudlo sa uwan.

Apan sige lang, daghan pa man kong

sinina diri sa bag nga wala pa gilabhan.