Paglabay sa mga katuigan

Ania na sab ko nagpahiluna

Ilawom sa dakong kahoy.

Dinhi gisukot sa akong pamalandong

Kadtong damgo nga gikaluha ko

Sa mga dahon sa maong punoan.

Gihimugso ang akong damgo

Dungan sa paggitib sa dahong malunhaw.

Hay... panahon na diay sa tinglaras

Maong gihugsaw ang akong pag- inusara

Sa nangapulak nga mga dahon

Lihok sa kinaiyahang ikapanag-ing

Sa damgong nalawos ug nalaya.

Lain na sab ning pagyam- id sa kapalaran

Nga nagsalmo sa akong pagyarok

Sa apdo sa kapakyasan

Idlas ang tingusbawan

Padayon kining gipadpad

Uban sa mga dahong laya

Paingon sa halayong kasadpan.

Hinaut nga makig- alayon si Haring Adlaw.

Ug sa iya unyang pagsubang

Mogimaw pud unta

Ang bidlisiw sa katumanan

Nga sarang ikapamasibas

Sa nagminghoy kong galamhan.