Pulang laso

Samaran ug daw makabsan na’g kinabuhi ang kuting nga si Mica

sa dihang nakit-an siya ni Temio.

pikas iyang dunggan

ug diriyot nang maputol iyang usang tiil

ug lugos mabuka iyang walang mata

apan daling nitaliwan iyang kakimpang

ug gibating kahapdos

kay adlaw-adlaw si Temio’ng

naghunad sa iyang mga samad

ug nag-uban niya

sa iyang matag pagbansay

aron mobalik sa naandang kalig-on

ang iyang mga tiil.

wa abti’g semana,

adlaw-adlaw na

ang pagba-iid,

pagkapyot,

pagki-ay,

pagsayaw,

pagligid-ligid,

ug pagbalitok

ni Mica

isip paglingaw

ni Temio.

tungod tingali niining

gihigtan ni Temio’g

pulang laso

ang liog ni Mica.

mas sadya baya’g

naa’y pulang pakapin

sa matag ba-iid,

kupot,

kapyot,

ki-ay,

ligid-ligid,

ug balitok.

ug sa dihang gibilin na si Mica ni Temio

dihang padulong na siya sa trabaho,

kalit mibutho sa bintana

ang usa ka dakong iring idlas

ug sa wa’y abiso,

milubong sa tanan niyang kuko

sa buko-buko ni Mica

ug mibira sa pulang laso

hangtod kini nihugot,

nihugot,

nihugot . . .