Pagkaplag sa kinutuban sa kilom-kilom

Taliwala sa mga pagtamay,

Gisugat nilang Panyang ug Garet

Ang hagit sa kilom-kilom.

Sa wa nila pagsapayan

Sa pagtungha sa kinalawmang

Kangitngit sa kagabhion,

Gisakmit sa ilang panaghiusa

Ang pagkabansay

Sa pamugsay ug pamasol

Nga nidala nila

Ngadto sa pakigbulig sa hangin

Ug pakigsayaw sa mga balod

Sa mangitngit pang kabuntagon.

Sa pagsubang sa adlaw,

Ang bidlisiw ang nisinyas kanilang,

Sak-on ang bungtod

Nga daw diin tigpahipi

Ang ginikanan sa matag pagsidlak.

Ug didto nila makit-i ang kabulakang

Sabakan sa mga binhing

Nagpadayon sa gasa sa kinabuhi

Ug katahum sa kinaiyahan,

Sa pakigtagbo nilang Panyang ug Garet

Sa kaanyag ug gahum

Nga timaan ug kabilin

Sa unang hugpong sa mga bulak

Nga nipaurong sa mga agila ug uwak

Ug nipadayon sa mga kabakaba,

Sa makausa pa gidalitan sila sa tubag

Nga gilikaylikayan sa kadaghanan

Sa panuki-duki nila’g pakisayod:

Sama sa kinailadman sa dagat

Nga di matugkad sa labing bansay

Nga tiglangoy kun dili tubig 

Ang palibot niya’g tugkaran,

Dili pud maangkon sa maalamon

Nga nasabtan na niya

Ang kinatibuk-an sa hardin

Kun kasagbutan iyang puy-anan.

Human madawat nilang

Panyang ug Garet

Ang ganti sa balak

Sa mga bulak sa bungtod

Sigun sa awit sa adlaw,

Ila nang nasabtan

Ang gipamulong sa dagat

Sa dihang kini miingon

Nga sila'y magdala ug kahingpitan

Sa hardin ug kadagatan.