Ang Kasugiran kun Ikaw Mahigugma sa Sigbin nga Namasin sa Bulan sa Naga

Sumala sa estorya, ang sigbin makadala

og bahandi sa katawhan dinhi sa Naga.

Apan dili sa kinabuhi ni Inday Luna.

Kay mao ni ang sinugdanan kun nganong naay

mga abat ug impakto dinhi sa punoan sa Talisay.

Kay sumala sab ni Lola Gloria, mag-amping ka

anang mga nawong nga sama sa yawa.

Labihan na kun kini naay dako nga pangil,

kay kini wala nag-apas sa imong paghuwas

apan sa imong bulahan nga lawas.

Kini siya way giila basta babaye na.

Siya mosupsop og dugo samtang ibuhagay niya

ang iyang makalipong nga baho.

Iyang ikog, modunggab sa imong pusod,

hangtod kini moluba sa imong unod.

Kuoton niya ang imong kasingkasing.

Dayon, inaton aron himoong anting-anting.

Ayaw intawn kalimti nga alang niya lami ang bata.

Siya managhoy inig labay sa mga tam-is og kalag.

Ug unta luwason ka aning kasugiran una ni molayag.