Tigmo sa Kasanag

Ikaw nga mahigugmaon og kaalam

Mogukod sa basibas sa kabuntagon

Ug mosuta kun asa kutob

Ang lagsik sa tigmo sa kasanag.

Ikaw nga nakabaton og gasa sa kahibulong

Gitahasang mokuykoy sa kamatuoran

Aron tukion ang kasayurang

Inumol sa kanhiayng mangangaplag.

Ikaw nga wa tugkig balhibo sa katalaw

Moasdang sa kinailadman

Mopagawas sa tinipigan

Ug mobuntog sa gahom sa paglimod og kataphaw.

Ikaw nga dunay mata

Sa usa ka henyo

Maoy motutok sa putling silaw sa katunhayan

Kay nasayod kaming

Di igong masud- ong namo ang bidlisiw

Aron masabtan ang kinaiya sa adlaw.

Andam kaming manalinghog

Sa mga sugid sa imong kasinatian

Bisan og tipak lamang kini

Sa pagtugkad mo sa kalamdagan.