Bathala sa Bag-o Kong Pagbati

O, Bathala sa bag-o kong pagbati

Lamdagi ang madulom kong kagahapon

Aron makabato’g kasanag

Ang pana ni Kupido

Nga kanunay’ng giibid- ibiran og kapakyasan.

Sanglit sayod ka man sa mga lihok niini

Hatagi ko’g mabungahong tingusbawan

Aron di na sab maghayon

Ang minghoy kong pakigbisog.

Karon nga migitib na sab

Ang tilimad- ong kasikas sa akong kasing- kasing

Buligi nga di mapal- ak

Ang matag pinitik niini

Aron di madugangan

Kadtong mga damgo nga gitampo ko

Ngadto sa mga tigmo sa kapalaran.

O, Bathala sa bag-o kong pagbati

Salamat sa mga pasumbingay

Nga gitanom mo sa akong kasing- kasing

Giabunohan man kini’g kapakyasan

Daghan gihapon ko’g nakutlo nga pagtulon- an.

O, Bathala sa bag- o kong pagbati

Salamat sa paghan- ay mo sa mga panghitabo

Sa pagtugyan mo’g laing kahigayonan

Nga mahimamat ko ang bag- ong kaplag.

Kanunay ko siyang alagaran

Kay siya lang ang katumanan

Sa gihambing kong pagbating

Ikaw ang tinubdan.

Daghang salamat!

O, Bathala sa bag- o kong pagbati!