Bugnong lugaynon

Tinagik ni Maria Eleanor E. Valeros

(Alang ni Wislawa Szymborska)

Kita mga anak sa atong panahon;

panahon nga tugob sa pamolitika.

Tanang hilisgotanan, adlaw ug gabii,

imo, ako, amo, ila,

tanan gilunopan sa agap nga pamolitika.

Sa magustoha’g sa dili,

ang atong kagahapon duna’y pat-ak sa politika,

bisan ang atong pamanit duna’y bulok niini,

diha sa atong mga mata may bantawan sa bugnong lugaynon.

Ang atong ipanulti manganawkanaw apan wa’y makapaminaw;

ug kun buot na lamang kitang magpakahilom

ang atong kamatooran mahinayak og panugid,

tuwaron man ang kalibotan, politika ang hinungdan.

Bisan sa atong pagbinugtaway sa bungtod

mihimo kita’g mga layat nga politikanhon

ubos sa politikanhong bantayog.

Bisan ang mga balak nga wala tagika pinahaom

sa saloma ning bugnong lugaynon

nangahimong balak sa pamolitika,

gidasonan sa pangutana kun ganahan ka ba’g politika

apan bisan ang pangutana may gibadlis nga suknang politikanhon.

Di man gani tingali kinahanglan pang mahimo kang tawo

aron lamang makabaton og gahom politikanhon,

ang kantidad sa krudo nagkupot na niini

lakip na’ng pasaw sa baboy, patuktok sa manok, bugas Ganador.