Sa iyang pagsalop
Mapahiyumong mikaway ang adlaw
Samtang bitbit niini
Ang nagkapid- ok nga kasanag.
Inanay siyang mikamang
Paingon sa halayong mga bungtod
Apan sa wa pa siya
Hingpit nga manamilit
Nagmugna siya'g matahom nga pasundayag
Nga maoy ampay
Sa mga binuhat
Nga lapoy ang kalawasan
Tungod sa tibuok adlaw
Nga panikay- sikay.
Nasud-ong ko usab
Nga miapas sa adlaw
Ang katapusang panon sa mga langgam
Paingon sa dapit
Kon asa sila magpalabay sa kagabhion.
Way kabutangan sa akong kalipay
Sa dihang nasikop sa akong mga mata
Ang bililhong pasundayag sa kinaiyahan.
Gidugangan pa kini
Sa hangin sa kilum- kilum
Nga mihapuhap sa akong mga panit
Sa dihang mibaktas ako
Paingon sa kalibutan kong nag- inusara.
Karong gabhiona
Way motugaw nga kamingaw
Samtang moluklok na sab ko
Sa akong kaugalingon.
Og ugma damlag
Bugtawon ako sa alisngaw sa banag- banag
Kay aduna na sab koy tulomanon sa paggimaw
Aron sugaton ang mabulukong paggimaw sa adlaw.