Taking-Kang-Kung Sa Valentine's Day

Sa akong phonebook ra nako gianggaan akong textmate og Daffalong kay wa gyoy kalainan iyang bayhon sa nawong ni Vincent Daffalong - ang ilong bukad pas payong. Hinoon bisag laksot nis Fernan alyas James alyas Joko, wa gyod ko panamastamasi ini bisag sa unang bahin sa among panagkaila nakahigayon nig pangilad nako. Nanglansis siya nga “tall, dark and handsome” kuno siya. Tinood hinoon - tall, dark, and “handsome-ma ng mukha!”

Wa dayon niya gihatag iyang tinood ngan kay tingalig labaw pa nya kuno kong hustler kay niya. Nagtoo siya nga dili ko makig-aybol maong pa TDH-TDH pa ang karaho. Gani sa una namong panagkita dapit sa Magellan’s Cross nga karon Plaza Sugbu na, daw sa miuyon ang lingganay sa Basilica del Sto. Niño nga mikaransay og “takingking-takingking-takingking”. Tinood nga nagtakingking pagduol nako si Daffalong dalang kaikog sa iyang pagkabakakon, liar-evil.

“Abi kog di na gyod ka moduol,” ako siyang gisikmatan. Ingon man kog basta molapas og un minuto, moaginod nakos Pilgrim Center kay di ko gusto maawahi sa pagsimba; wa ko maanad anang morebyu og Balaang Misa. Unsa, sine?

“Suko ka? Sowe ha?” niya pa.

“Sowe ka jan. Taronga na imong sinultihan. Dili na ni text,” panupo nako.

“Bitaw, pangit ko sa?” nangutana pa.

“Pangayo’g pasaylo sa Ginoo karon ha, goryoha ka,” akong tambag.

Valentine’s Day gyod to. Very memorable! Kun sa Tinagawog pa, “tandang-tanda ko pa”. Mi-text siya nako, “Haller, Kiks (Kikay akong angga) advnz hapi valntimes u dha, ktakitz n jud t huh?”

Unsa ba sad ning tawhana uy, kadako nang kabaw, Valentimes lang gihapoy dungog? Unsa, Valentimes one, times two, times ten?

“Times sa u mata. Pagxure woi. Tines na. D q kita u ky bcn naa u bad vibes,” ako siyang gikabuangag text back. Wa dayon siya mo-reply. Abi nakog nasilo siyas akong gitext. Apan sa Valentines Day mismo, migasto gyod siyag panawag nako ug mihangyo nga dayonon ang “di matabas-tabas” nga eyeball. Matabas pay Red Sea , nungka ang eyeball.

Gitagana alang sa tanang nanagminahalay ang wali sa sipat nga pari. Maayo pod kay napasabot ni Fr. Andy nganong dunay Valentine’s Day. Kinsa nas Saint Valentine ug unsay gidangatan niya human niya pangkasla ang mga managhinigugmaay niadtong panahona bisag wala ni tugoti sa balaod sa Roma ubos ni Emperador Claudio. (Naks! Gitiman-an gyod nako ang giasoy ni Fr. Andy mahitungod sa ka-kill joy adtong emperadora!)

Uyab na man ming daan sa text, gipaundayonan na lang namo among relasyon kay tinood gyod diay nga sa kadugayan maanad ra kag sud-ong sa ilong bukad pas payong. Pila ray istorya, misangpot sa kaminyoon ang among panaghinigalaay sa text. Mitiyabaw ang kampana og tikangkang-tikangkang-tikangkang. Hastang lipaya ni Daffalong. Mora na go’g magisi ang apapangig sa pinainat nga pahiyom. Bisag taliwala sa seremonya sa kasal, mo-pasimple pa gyog hunghong nako nga maka-iskor na kuno siyas kataposan.

“Valentine’s Day, Valentine’s Day giihaw ang bakang way swerte; Valentine’s Day, Valentine’s Day gi-de lata, gi-karne norte,” hagawhaw-sumay niyas kanta ni Max Surban.

Naputos siyas kinusian kay sige man sab kog pamadlong nga di magkiat iyang nawong kay makaikog sa mga nanambong. Naghinamhinam nang makadimdim kay nagdumili gyod ko pagsurender sa Bataan sa nakalabayng Valentine’s bisag mikuyamang tinoora sa akong batiku’n alyas “krigignol” ang kagilok sa iyang tineksan. Mikubong man god nako ang tumang kahadlok tungod sa mga dili maayong gidangatan sa uban sa kamot sa ilang textmates. Intawon, usa ra raba akong kinabuhi!

Apan lagi kay naungo mans Daffalong sa text-text, nagpunay pod diay siyag pakiglambigit sa usa ka babayeng minyo nga ang gihimong pahungawanan sa kalaay mao ang pagpamungkag og pamilya. Nasakpan silas bana sa usa sa ilang mainitong panagtagbo sa mamingaw-bugnawng lugar sama sa menteryo. Ug nahalin gyod si Daffalong tungod sa iyang tinonto. “Tablaw ka Daffalonga ka! Maglubong kuno, lahi ang gilubong. Mositsirikoy ka na man lang gyod, di na lang seguroon nga daga.”

Valentine’s Day gahapon. Nagtoo kog makasaulog pa mis among anniversary. Misimba ko apan lahi na ang tonadas kampana. Tikungkong-tikungkong-tikungkong.