Kung gugma lang makaon

“Bahala’g saging basta kay labing”

Matod kini sa manag-tiayon,

Nga saging ang pamahaw, paniudto ug panihapon.

‘Na hala, ato silang pasagdan,

Kay mao man kaha kini ang gisinggit sa ilang dughan.

Ang tibuok kalibutan karon naglisod,

Tanang katawhan, ang tiyan wala nay sulod.

Apan ang Pinoy bahala’g magkalisud-lisod,

Sa labing-labing way lipud-lipod!

Ang tawo sa atong nasud nagkadaghan,

Bunga kini sa labing-labing nga walay undang.

Kung labing-labing pa laman naay suweldo,

Si Juan de la Cruz na ang pinaka-milyonaryo.

Subo man nga palandungon,

Nga ang mga dagkong kompanya purdoy na.

Kung labing-labing mura lang og pabrika,

Layo ra gyud hinuon ang MEPZA.

Tiaw mo nang mas daghan pa ta kaysa Australia!

Kung ang gugma lamang makaon,

Aw, wala hinuoy gutomon.

Apan unsaon, dili ra man kini ang dapat huna-hunaon,

Busa kita angay gyud nga makat-on.