Ning haw-ang nga lantay

Kun mahimo pa nga santakuhon

ang nangugat nga kamingaw,

gibuhat ko na. Di ko gustong

magbilin og mga tunob sa hangin

ang gipadpad nga saad nga gitanom

mo sa akong dughan diin ikaw

mihangop sa laing baybayon.

Way kainit ang kadulog

kong unlan ning lantay

tang kawayan. Ang gakos sa

tun-og sa kagabhion kanunay

gitandayan sa kahinam. Saksi

ang mga gutlo sa akong paghukdong

sa bentana sa atong payag.

Bisag gum-os na ang papel

nga nagdugtong sa atong pagbati —

namasin ako nga hapuhapon kini

sa nangaghong mga balod sa lawod!

Na unsa naman ni karon?

Ni Ttimoteo C. Margaha III

Na unsa naman ni karon?

Ang mga kabataan di na matinahuron,

Nagkatibulaag tungod sa bato,

Kining igsoon nato nga wala kaamgo.

Na kining butanga,

Makadaot gayud sa pag-iskwela,

Hala! Sige’g goryo - goryo,

Ang nawong lupyak na kaayo.

Wala ba kamo nagpakabana,

Na kini nagdaot lang sa inyong ugma?

Naluya og paglabada ang inahan,

Gikapoy usab pagkayod ang amahan.

Unya mao raba kini atong ibalos?

Sa atong inahan ug amahan nga nahiubos.

Hoy! Tawo, Pagmata na,

Basig inig kinatapusan, magmahay ka.