Bag-ong commander sa VISCOM pormal nang milingkod

CEBU, Philippines — Pormal nang milingkod isip bag-ong commander sa Visayas Command (VISCOM) si Major General Moises L. Micor PAF atol sa Change of Command Ceremony kagahapon Oktubre 5, 2026 sa Camp Lapulapu, Apas, Cebu City.

Si General Antonio G. Nafarrete PA, Chief of Staff sa Armed Forces of the Philippines (AFP), maoy nangulo sa seremonyas diin pormal nga gitugyan kang Micor ang awtoridad ug responsibilidad sa pagpangulo sa VISCOM.

Mipuli si Micor kang Major General Peter B. Burgonio PA, nga nagsilbi isip acting commander sa VISCOM samtang nagpadayon usab siya isip commander sa Joint Task Force STORM o 8th Infantry Division sa Philippine Army.

Atol sa iyang panahon isip acting commander, gipadayon ni Burgonio ang operational readiness sa VISCOM ug ang mga paningkamot sa pagpanalipod sa mga komunidad ug pagpreserbar sa mga nakab-ot sa kalinaw ug kalamboan sa Visayas.

Si Micor miyembro sa Philippine Military Academy (PMA) “Maalab” Class of 1993 ug adunay daghang kasinatian sa command ug leadership assignments sa Philippine Air Force (PAF).

Sa wala pa siya mipuli sa VISCOM, nagsilbi siya isip commander sa Air Mobility Command (AMC), wing commander sa Tactical Operations Wing Central (TOWCEN) ug wing commander sa 205th Tactical Helicopter Wing.

Niadtong Septiyembre 2026, isip commander sa AMC, kauban si Micor sa seremonyas sa pagdawat sa PAF sa duha ka bag-ong Bell 412EPX utility helicopters sa Villamor Air Base sa Pasay City.

Sa paglingkod ni Micor, gipadayon ang misyon ug operasyon sa VISCOM sa Visayas bisan pa sa pagbag-o sa liderato.

Gilauman nga ipadayon ni Micor ang mga nasugdan sa miaging liderato ug ipadayon ang paningkamot sa VISCOM sa pagserbisyo ug pagpanalipod sa mga tawo sa rehiyon. (BANAT NEWS)