Cebu City hanap makalabay sa Binaliw

CEBU, Philippines — Hanap pa gihapon ang posibilidad nga makalabay og basura ang Dakbayan sa Sugbo sa Binaliw landfill tungod kay wala pa mabayran ang utang niini.

Ang kagamhanan adunay P130 milyones nga utang sa Prime Integrated Waste Solutions Inc. (PWS) gikan pa sa miaging adminstrasyon.

Suma pa ni Mayor Nestor Archival atol sa iyang pagbalik ug pagpakig-atubang sa hugpong sa media kagahapon, Oktubre 5, 2026, dili pa andam ang PWS nga modawat pag-usab sa basura sa siyudad.

“Dili pa sila, kay dili pa gyud sila ganahan because wala pa gihapon ta kabayad sa utang. So, we cannot do anything about that for now,” matud niya.

Nibalik na sa operasyon ang PWS human nga hingpit nga gilibkas sa Department of Environment and Natural Resources - Environmental Management Bureau ang ceast-and-desist order niadtong Agosto 13, 2026.

Samtang naghuwat nga makabalik og labay sa Binaliw ug nagpadayon ang rehabilitasyon sa maong landfill, naninguha ang mayor nga mokunhod ang gidaghanon sa basura nga ipadala sa landfill didto sa Aloguinsan.

Sa 120 ka tunghaan sa syudad, anaa na sa 30 na ka tunghaan ang nisalmot sa “Basura Namo, Kaugmanon Nato” nga usa ka  programa diin ang ilang basura ilabi na ang plastik, dili na diretso ilabay sa basurahan ug ipadala sa landfill. b Ipundo kini sa tunghaan aron nga ma-recycle ug ang matag kilo sa mga tinun-an, bayluan og 50 sentimo.

Sa pangutana kung “out of the picture” na ba ang Binaliw, mitubag si Archival nga sa pagkakaron, gihangyo gihapon nila ang Binaliw nga modawat bisan og limitado nga gidaghanon sa basura apan nibalibad kini.

“Ang atong ginahangyo nila na bisan 100 tons lang. Bisan kadiyot lang, pero dili mangyud sila,” matud pa  ni Archival. (BANAT NEWS)