Giduso nga garbage processing project patun-an ni Archival

CEBU, Philippines — Giklaro ni Cebu City Mayor Nestor Archival nga dili gikan kaniya ang proposal sa Suki Trading Corporation kabahin sa garbage processing nga proyekto ug dili sab siya ang nakigtransaksyon sa maong kompaniya.

Matud pa ni Archival nga ang tanang dokumento gikan sa Suki Trading Corporation gihatag niya sa konseho aron matun-an.

Apan gibalik sa konseho ngadto sa Office of the City Mayor ang P470 milyon nga garbage-processing project tungod kay gikwestyon ni Bise Tomas Osmeña ang pagburot sa presyo diin ang pasiunang tanyag anaa lang sa P250 milyon.

Atol sa regular nga sesyon sa konseho niadtong miaging semana, girefer balik sa mayor ang proposal aron masusi pag-ayo ang mga detalye niini, ilabina ang teknolohiya nga gamiton, gasto, ug mga posibleng kabalaka sa publiko.

Gihimakak sab sa mayor nga siya ang nagpasiugda sa thermal o incinerator component sa proposal.

Suma sa mayor nga tinguha usab niya nga masusi kini pag-ayo sa konseho tungod sa mga kabalaka nga kasagarang gilambigit sa paggamit sa incinerator.

Gibutyag usab sa mayor nga dili siya makahatag og klarong posisyon bahin sa P470 milyon nga kantidad tungod kay wala siya direktang nakigsabot sa kompanya bahin niini.

Matud pa niya nga ang presyo nga anaa sa proposal mao lang ang kantidad nga gihatag ngadto kagamhanan ug wala siya’y kasayuran bahin sa giingon gipaburot ang presyo.

Gihisgutan usab niya ang panginahanglan nga ikumpara ang proposal ug susihon ang kalainan niini kung adunay laing bersyon o bag-ong proposal nga mahimong isumiter.

Giklaro sab ni Archival nga walay nagtangag nga joint venture agreement tali sa kagamhanan ug Suki Trading Corporation tungod kay proposal pa lang kini sa pagkakaron. (BANAT NEWS)