Grade 10 student, nahulihan ng baril sa bag
MANILA, Philippines — Isang Grade 10 student ang inaresto nang mahulihan ng baril sa loob ng isang eskuwelahan sa high school sa bayan ng Barotac Nuevo, Iloilo nitong Martes.
Ayon sa ulat ng Iloilo Provincial Police Office (IPPO) ang nasabing estudyante na isang 15-anyos na lalaki ay nakumpiskahan ng isang cal.38 revolver na may anim na bala.
Nabatid na isang estudyante ang nagsumbong sa kanilang guro na may dalang baril sa bag ang nasabing Grade 10 na kaniyang kaklase.
Agad ipinatawag sa guidance counselor ang nasabing estudyante sa pakikipagkoordinasyon sa Barotac Nuevo Municipal Police Station (MPS) na mabilis namang nagpadala ng mga personnel sa nasabing eskuwelahan.
Nang inspeksiyunin ang bag ng estudyante ay dito na bumulaga sa mga guro at mga pulis ang baril na dala.
Iniimbestigahan ang estudyante kung saan nito nakuha ang baril, sino ang may-ari at bakit may dala itong baril sa eskuwelahan.
Ikinatwiranng estudyante na pang-self defense umano niya ito sa mga mambu-bully sa kanilang paaralan.
Ang nasabing estudyante ay itinurnover sa kustodya ng Municipal Social Welfare and Development (DSWD) dahilan isa itong menor de edad.
- Latest
