Senior citizen nga wanted sikop sa kapolisan sa Poro

CEBU, Philippines — Usa ka 69-anyos nga lalaki kinsa nag-atubang og kasong rape ug nalakip sa talaan sa kapolisan isip top most wanted person sa regional, provincial ug municipal level ang nasikop sa kapolisan ngadto sa Barangay Eastern Poblacion, Lungsod sa Poro, Isla sa Camotes niadtong Martes.

Ang suspetsado, usa ka biyudo, nagpuyo sa Western Poblacion, sa maong lungsod gidakop subay sa warrant of arrest nga giisyu sa Regional Trial Court in Cities Branch 92 sa Dakbayan sa Danao gumikan sa kasong rape ubos sa Article 266-A sa Revised Penal Code.

Ang korte wala motugot og piyansa alang sa temporaryong kagawasan sa suspetsado.  Base sa taho sa Poro Municipal Police Station nga gipahigayon ang operasyon ubos sa koordinasyon sa Regional Intelligence Division-7, Regional Intelligence Unit-7 ug Provincial Intelligence Unit (PIU) human nakadawat og impormasyon kabahin sa nahimutangan sa suspetsado.

Gikataho nga dugay na’ng nagtago-tago ang suspetsado diin kanunay kining nagbalhin-balhin sa iyang nahimutangan ngadto sa mga hilit ug bukiran nga lugar ug  naglikay kini nga makita sa mga paryente ug mga sakop sa komunidad.

Giawhag sa Cebu Police Provincial Office ang publiko nga magpadayon sa paghatag og impormasyon nga makatabang sa pagdakop sa ubang mga pinangita sa balaod. (BANAT NEWS)