Tumulak: Undangon ang pagbasulay sa kalangan sa sweldo sa Jos

CEBU, Philippines — Nanawagan si Konsehal David “Dave” Tumulak ngadto kang Cebu City Mayor Nestor Archival Sr. ug Bise Mayor Tomas Osmeña nga undangon na ang pagbinasulay mahitungod sa kalangay sa paggpagawas sa sweldo sa 956 ka job order employees ug project-based personnel.

Gipasabot sa tsirman sa Committee on Budget and Finance nga ang pag-endorso sa manpower requests ngadto sa Sangguniang Panlungsod adunay legal nga basihan ubos sa Section 12 sa City Ordinance No. 2795 kun “2026 Annual Budget”. Matud ni Tumulak nga gikinahanglan ang pagrepaso o pag-review sa konseho aron masiguro nga ang mga manpower requests nahiuyon sa naaprobahan nga pundo ug malikayan ang sobra nga pagdawat og job order personnel.

 Ang budgetary review nakapamatuod nga adunay pipila ka mga opisina nga nilapas sa ilahang giaprobahang manpower budget hinungdan nga gikinahanglan ang pagsunod sa mga lagda sa budgeting, accounting ug auditing.

Ang 2026 Annual Budget gideklara na’ng epektibo sa Department of Budget and Management niadtong Disyembre 2, 2025 ug kinahanglang sundon ang tanang probisyon niini.

Gipasabot usab ni Tumulak ang normal nga proseso sa manpower request una aprobahan sa mayor ug i-endorso ngadto sa SP Secretariat ug dawaton sa Committee on Budget and Finance ug maghimo og committee report dayon moagi na kini sa opisina sa bise mayor isip presiding officer sa konseho nga mapirmahan ug mobalik sa buhatan sa mayor ug aron usab nga maproseso sa Budget Office ug City Treasurer ang payroll ug payout.

Daghang hinungdan ang pagkalangan sa proseso sa sweldo diin magsugod kini sa departamento mismo sama sa kausaban sa sweldo, pag-ilis sa mga ngalan sa personnel, nalangan nga pag-aproba sa manpower requests gikan sa Office of the Mayor ug ang pagsunod sa mga regulasyon sa budget aron malikayan ang dili angay nga paggasto nga mahimong kwestiyonon sa Commission on Audit (COA).

Alang kang Tumulak wala na’y panahon aron nga magbinasulay ang mayor ug ang bise mayor human nga gipakasad-an ni Osmeña si City Administrator Albert Tan nga giingong mao ang nakapalangay sa sweldo sa mga empleyado ug nidepensa usab si Archival nga ang konseho ang nakapalangay tungod sa gikinahanglan nga procedural requirements.

Gikataho nga dili kini ang unang higayon nga nalangan ang pagpagawas sa sweldo sa job order employees tungod kay nagsunod lang ang kagamhanan sa mga lagda sa accounting, auditing ug budgeting procedures sa COA ug Budget Office. BDB BANAT NEWS