Tapok sa burereng
Usa ka kilong burereng (kanang igo lang ang gidak-on, di kaayo dagko ug di sab kaayo gagmay), tunga sa kilong tamatis (mas maayo kon dunay iba, mas aslom mas lami), sili, asin ug gamayng sabaw. Kon mobukal na, kinahanglan nga haunon sa di pa molapas sa 20 ka gutlo aron nga di malata ang humok nga unod.
Ang labing maayong putahe mao ang pagluto sa burereng nga morang inun-onan. Apan lami sab ang burereng nga daghanon og sabaw nga morang tinowa nga kinamunggayan. Mahimo ganing hawoban sa bagang uling morang bulinaw.
***
Mao nay kasinatian sa burereng ni Talisay City Councilor Manuel Cabriana. Kinsa wa g’yud unta mangambisyon pagtilaw sa gikaintapan nga isda. Hangtod nga nakakaon siya sa burereng nga giluto sa kawani sa iyang negosyo sa baboy. Sukad niadto wa na siya mohunong og kaon.
Gani, nagpatudlo siya unsaon sa pagluto. Mao nga sa matag dagsa sa burereng gikan sa Bantayan sa ilang merkado sa Tabunok, mopalit g’yud ug siya ang mangunay pagluto ug mangimbitar sa suod niyang mga higala nga, sama niya, human nakatilaw nahigam ug nagsige og pangita.
***
Wa kahibawo si Cabriana kon mao ba sab sa ubang bahin sa Sugbo. Apan nabantayan niya nga labihang daghana nga ganahang mangaon og burereng sa Talisay ug kasilinganang mga dapit. Kay motidlom ang halin sa iyang karneng baboy matag Hulyo ug Agosto nga maoy ting-burereng.
Nipasabot si Cabriana nga daghang mamalit og burereng bisan sa mga pasidaan sa kakuyaw tungod sa kabarato kon itandi sa mga karne ug ubang isda. Ug sa talagsaong kalami.
***
Atol sa Arangkada sa dyAB Abante Pa, Bisaya!, niangkon si Cabriana nga mas lami gihapon ang mahalon nga mga isda apan lahi ang burereng tungod sa kalalim sa atay, kahumok sa unod, ug makaon hasta ang bukog.
Mas lingaw sab ang pagkaon og burereng kay mahimong rason sa pagtapok sa pamilya ug mga higala. Inigka hurot sa burereng magakataw-anay tungod sa kadagko sa mga bundo sa mga salin --may di ganahan sa ikog ug may di sab ganahan sa sungo. Si Cabriana way salin bisan gamayng bukog. Apan nikumpisal nga wa pa siyang kasuway ug wa sab mangambisyon pagtilaw sa mas dagkong butete.
- Latest
