Dugang mga opisina buksan sa LTO

CEBU, Philippines — Ang Land Transportation Office sa Central Visayas (LTO-7) mag-abli og dugang mga site diin ang mga motorista mahimong makabayad sa mga multa ug silot tungod sa mga paglapas sa balaud sa trapiko, taliwala sa pagdagsang sa mga nadakpan gumikan sa gipakusgang pagpatuman sa balaod sa karsada.

Matud sa LTO-7, ang pagsaka sa gidaghanon sa mga nadakpan maoy hinungdan sa taas nga linya sa matag adlaw sa Operations Division office niini sa Bacalso Avenue, Cebu City.  Gumikan niini mipalit ang LTO-7 og dugang desktop computers ug laptops ug magtukod og dugang nga mga settlement site sa pipila ka district ug registration offices.

Lakip niini ang Danao City District Office, Liloan District Office, Consolacion District Office, Lapu-Lapu City District Office, Mandaue City District Office, ug Talisay Registration Office.

Gidasig usab sa LTO-7 ang mga motorista nga gamiton ang online settlement facility sa Land Transportation Management System (LTMS) Portal alang sa mga multa ug silot nga resulta sa pipila ka mga apprehension.

Matud sa LTO-7, mahimong gamiton ang online settlement alang sa basic o simple nga mga paglapas, lakip ang pipila ka paglapas nga may kalabotan sa hustong paggamit sa motorcycle helmets, seatbelts ug uban pang mga paglapas nga sakop sa LTMS system.

Gitambagan ang mga motorista nga susihon una ang opisyal nga listahan sa mga paglapas nga kwalipikado alang sa online settlement sa dili pa ipadayon ang transaksiyon. Samtang, magtukod ang LTO-7 og Online Settlement Help Desk duol sa Operations Division office aron motabang sa mga motorista nga nanginahanglan og giya sa online payment process. Motabang usab ang help desk sa publiko sa mga kabalaka may kalabotan sa LTMS Portal, lakip na ang account access, usernames ug nakalimutang passwords.

Sa usa ka pamahayag, gipasalamatan ni LTO-7 Regional Director Atty. Wendel C. Dinglasan ang publiko sa pagpadayag sa ilang mga kabalaka pinaagi sa online platform sa ahensya ug sa pagtabang sa LTO-7 sa pagpauswag sa paghatod sa serbisyo publiko. (BANAT NEWS)