EDITORYAL - Gun violence, dili ikalimod

Dili ikalimod nga dakong tinuod ang pamahayag ni Bise Presidente Sara Duterte didto sa atubangan sa nag-rally sa atubangan sa The Hague sa The Netherlands nga grabe kadako ang problema sa ‘gun violence’ dinhi sa Pilipinas.

Kini bisan pa man nga ang Pilipinas may dunay usa sa dunay labing bug-at nga mga silot sa mga kriminal nga mapamatud-ang nigamit og armas sa paghimo og krimen.

Si VP Duterte mihisgut aning gun violence didto agi og paghulagway sa sitwasyon dinhi sa Pilipinas ug gikonektar niya kini sa posibleng maoy nahitabo sa mga nangangkong mga biktima sa extra-judicial killings nga karon gipasangil batok sa iyang amahan nga si kanhi presidente Rodrigo Duterte nga gikasohan karon og crime against humanity sa International Criminal Court.

Ang ingon sa bise presidente, wala pa daw mapatud-i sa korte kun kani ba tanang reklamante batok sa iyang amahan, mga tinuod bang biktima sa EJK.

Posible daw nga personal ang motibo o dunay kaaway ang mga biktima maong sila gipatay o gipapatay, ug posible sab daw nga biktima sila sa pagpanulis.

Pero  base sa mga nanggawas nga mga nangaging mga report bahin sa mga tagtungod nga nipasaka didto sa kaso sa ICC, wala nilay gaingon nga biktima sa tulis o dunay kaaway ang mga napatay nilang kadugo, kondili, mga polis ang nagpusil kanila atol sa dugoong war on drugs ni FPRRD, kay matud pa “nanlaban.”

Naghimo sab siya og sanglitanan, kun pananglitan daw ang iyang bana nangabit, sayon ra kaayo ang pagpangita og tawong puydeng mopatay sa iyang bana sa kantidad nga P5,000.

Kani nga pamahayag may pagkatinuod, kay pipila na ka mga nangadakpang gun for hires ang niangkon nga usahay ang ilang kontrata pagpatay og tawo, P3,000 lang, depende ang bayad sa pagkatawo sa ilang target.

Naa na unya sa ICC ang pagsusi og maayo sa tanang ebidensiya ug testimonya kun makaapektar ba ning gun violence dinhi sa kaso sa kanhi presidente.