Nag-vandal, inahan gipatawag sa mayor

CEBU, Philippines — Nakigkita na kang Mayor Thadeo Jovito “Jonkie” Ouano ang menor de edad nga lalaki nga giila nga nalambigit sa vandalism sa usa ka pampublikong tunghaan sa siyudad.

Ang maong suspek nakit-an sa closed-circuit television (CCTV) nga nag-vandalize sa eskwelahan niadtong kaadlawon sa Hunyo 10.

Nailhan siya human makadawat ang lokal nga kagamhanan og impormasyon gikan sa usa ka wala nagpailang tawo nga nakaila sa maong batan-on.

Nahitabo ang personal nga pag-atubang niadtong Huwebes, Hunyo 18, diin miapil usab ang inahan sa 16-anyos nga suspek.

Gipadayag sa mayor nga ang menor de edad nagpuyo sa Barangay Centro.

Isip aksyon sa siyudad, ipaubos ang menor de edad ug ang iyang ginikanan sa intervention program nga naglangkob sa community involvement service ug counseling.

Ipatuman kini pinaagi sa City Social Welfare Services Office (CSWSO) aron matabangan ang menor de edad nga masabtan ang epekto sa iyang nahimo ug mapalig-on ang responsableng pamatasan.

Sumala sa Mandaue City Police Office (MCPO), padayon pa ang imbestigasyon sa uban pang miyembro sa grupo nga giingong nalambigit usab sa susamang mga insidente sa vandalism sa ubang barangay sa siyudad.

Si Ouano miingon nga ang maong menor de edad mao ang responsable sa pagsulat og “SOLO” sa mga bungbong sa eskwelahan ug sa pipila ka lugar.

Sumala  sa mayor, usa ka dakong hagit sa kampanya batok sa vandalism kay kun menor de edad ang nagpabadlong dili man mapriso.

Ning bag-o, gustong amendahan ang kasamtangang ordinansa batok bandalismo. Ang mga ginikanan sa mga menor maoy silotan.

Mao ra ni ang nakita nilang epektibong pamaagi aron mahunong kining bandalismo sa syudad.

Kadtong tawong nisumbong, gipahalipayan ni Ouano og ?5,000.

“We are serious in our fight against vandalism. Salamat sa mga Mandauehanon nga mitabang sa pag-ila sa mga responsible. Let’s help keep Mandaue clean, orderly, and respectful of our shared public spaces,” dugang pa niya.

Gihangyo usab sa mayor ang publiko nga magpadayon sa pagreport sa mga insidente sa vandalism ngadto sa mga awtoridad. IBM BANAT NEWS