“Zero remittance”

Mibahad ang mga Overseas Filipino Workers (OFW) nga mga dumadapig ni kanhi presidente Rodrigo Duterte nga molusad sila og “zero remittance week” agi og protesta sa gobyerno tungod sa pagtugyan niini sa kanhi presidente ngadto sa International Criminal Court.

Tumong sab sa maong protesta mao ang pag-pressure sa gobyerno aron dad-on pagbalik si Duterte dinhi sa nasud.

Dili malalis nga ang dollar remittances sa mga OFW dako og natampo sa ekonomiya sa nasud busa kun mahitabo gyud ang bahad sa mga dumadapig ni Duterte siguradong maapektohan ang atong ekonomiya. Apan ang pangutana unsa kadaghan ang mga OFW ang mosalmot sa maong protesta?

Sigun sa taho, dili tanang OFW ang uyon  sa maong plano. Usa sa mga mipadayag og pagsupak niini mao ang grupo sa Migrante International nga maoy orihinal nga nagpasiugda sa maong matang sa protesta kaniadto aron pag-pressure sa gobyerno nga hunongon ang di makiangayon nga mga polisiya alang sa mga OFW.

Ang Migrante mipasiugda na kaniadto og “zero remittance day” panahon sa administrasyon ni kanhi presidente Noynoy Aquino aron batukan ang pagpatuman og umento sa buhis alang sa mga balikbayan boxes nga ipadala sa mga OFW ngadto sa ilang pamilya dinhi sa Pilipinas.

Gawas niini, nilusad napud sila og susamang kalihukan niadtong panahon ni kanhi president Gloria Macapagal Arroyo. Sulod sa us aka adlaw nila nga protesta, minilyon ka pisos ang nawagtang sa ekonomiya sa Pilipinas.

Apan matud sa Migrante nga niining higayona, dili sila mosuporta tungod kay alang nila di makiangayon nga gamiton ang maong protesta alang lang sa benepisyo sa usa ka tawo. Nagtuo ang Migrante nga angayang atubangon sa kanhi presidente didto sa ICC ang iyang kaso.

Kun way suporta sa ubang mga OFW, labi pa sa Migrante, ang planong “zero remittance week” unsa man kaha kadako ang epekto niini? Posibling makaapekto tinuod sa ekonomiya sa Pilipinas, apan kinsa may mas labaw’ng maapektohan? Dili ba ang ilang mga pamilya nga nagsalig sa kwartang ilang ipadala?

Dili mabangkarota ang panudlanan sa nasud kun way remittance sud sa usa ka semana ang mga OFW nga supporters ni Duterte apan ang ilang pamilya posibling way malung-ag ug way ikabayad sa kuryente, tubig ug uban pang bayranan sud sa semana nga way moabot nga remittance.

Dili ang gobiyerno ang ilang gisilotan sa maong plano kun dili ang ilang mga pamilya!