Korte ni Trillanes
Ang press conference ni kanhi Senador Sonny Trillanes gahapon nakapahinumdom sa publiko nganong laay ug libog ang impeachment trial ni Bise Presidente Sara Duterte. Nga imbes hatagan og higayon nga mabisto ang mga ebidensiya ug mga testigo nalubong sa walay kinutoban nga technicalities.
Bisan gipahinumdoman ang tanang hingtungdan nga lahi sa ubang husay sa korte, nga naputos sa mga lagda nga mga gradwado ra sa abogasiya ang malingaw ug makasabot, ang husay ni VP Sara naggapos sa mga pangutana ug mga ebidensiya nga siyam-siyaman una matarung sa pagtubag ug pagpakita.
* * *
Ang pag-atubang ni Trillanes sa publiko aron pagpakita sa mga ebidensiya batok ni VP Sara hinaot nga nakapamata sa senator judges nga ang pagpasabot sa katawhan haom pa ba nga magpabilin sa puwesto ang sinumbong mao ang labing importante nga tuyo sa husay.
Dili ang pagpaka aron ingnon nga labaw pa sila sa tinuod nga mga mahistrado nga maningil sa kinabug-atan nga mga ebidensiya nga igong makapa-konbikto sa labing bangis nga kriminal. Hinikalimtan nga dili sila makapa-priso o maka-multa, kon dili igo lang makatangtang o makapabilin ni VP Sara sa puwesto.
* * *
Ang direktang pagpasabot ni Trillanes sa kaseryuso sa mga implikasyon sa mga pasangil batok ni VP Sara hinaot nga nakapukaw sa House panel of prosecutors nga ang katawhan walay pailob sa pagpaabot kanus-a moirog ang nagkamang nga husay.
Mas dinalian ang inadlawng mga panginahanglan ug mas seryuso ang hulga sa kagamay sa kita, kataphaw sa edukasyon sa mga bata ug kalisod pagpatambal. Gawas pa, nauwahi nang pagpaningil ni VP Sara ug ubang gipasanginlang mga kawatan.
* * *
Ang pagtingog ni Trillanes bisan gisalikway sa impeachment court hinaot nga nakapapugwat ni VP Sara ug sa iyang defense team nga dili sila hangtod sa hangtod nga makapasalipod sa walay kuka-uwaw nilang paglangay-langay, paglibug-libog ug paglipat-lipat ug pagpa-ugat.
Nga kon dili siya motarung sa pag-atubang ug pagtubag sa nagbuntaog nga mga ebidensiya sa pagpangawat ug pagbudhi sa pagsalig sa mga botante nga nipahimutang niya sa katungdanan, ang katawhan mas tarung, mas ligdong ug mas gamhanan. Kay sa mga alyado nga nag-ulog-ulog niya ug sa mga kaatbang nga nahulga sa naghinobra niyang kahangol sa gahom.
* * *
- Latest
