Makahinumdom sa ex

Dear Tito Miguel,

Maayong adlaw, ako diay  si Christian. Naa na ko’y girlfriend karon nga ginganlan og Jesha, ug walo na ka buwan ang among relasyon.

Grabe nako ka love ang akong uyab ron. Apan  bisan pa man nga naa nako’y uyab , dili gihapon nako makalimtan akong ex-girlfriend nga si Melissa. Usahay, kalit lang siya mosulod sa akong hunahuna ug mabalik ang mga memories namo sauna. 

Ambot uy, naunsa naman ko, kalit man masulod sa akong huna-huna ang akong ex-girlfriend, nga bout huna-huna on, malipayon naman ko sa akong love life karon.

Kabalo ko nga dili na husto nga pirmi pa gihapon nako siya mahunahunaon ilabi na nga naa na koy uyab.  Wala sad ko mosaba sa akong uyab kay dili ko ganahan nga masakitan siya.

Tito Miguel, dili ko kaingon nga naa pa ko’y feelings sa akong ex-girlfriend, sanglit segurado man gyud ko sa akong kaugalingon nga love gyud nako ang akong uyab karon . Ngano kaha nga naa gihapon sa akong huna-huna ang akong ex? Unsaon nako pagkalimot niya? — Christian

* * *

Christian,

Normal ra na nga imong mahinumdoman imong ex maski duna na ka’y laing present. Pero wala nimo giklaro unsa imong bati-on kun makahunahuna ka niya. Kun gimingaw ka, buot pasabot wala pa ka hingpit nga naka move on sa inyo relasyon. O dili ba kaha dunay naa sa imong ex nga ganahan kaayo ka apan wala sa imong present. Ayaw kabalaka, mohupas ra na’g iyaha.

Kun wala maapektohi inyong relasyon karon, imong pagtratar ug pagpangga sa imong present, mao ra gihapon, pasagdi lang. Mora ra gud na’g nakadumdum ka sa lingaw sa imong pamilya o barkada, labi na kaniadto’ng high school pa. Pero kun gusto na ka magkita mong duha, lahi na na nga istorya.

Kun igo ra gyud siya mosantop sa imong hunahuna apan wala na kay gibati, tingali igo ra gud ni flashback imong memory bank. Kun wala ni nimo tuyoa, ayaw kabalaka. Ang problema ra gyud ka’y kun pangitaon na nimo siya. Kun kutob ra sa imong hunahuna, ayaw pugsa nga hingpit ka nga makalimot niya.

Kun gusto gyud ka, suwayi ni. Hinumdumi unsay rason ngano nagbuwag mong duha. Lagmit bug-at o ngil-ad gyud na. Kun ikaw ang sad-an, basin na kunsensiya ka lang. Kun siya ang sad-an, ang iyang gibuhat mao’y isilsil sa imong alimpatakan aron dili na ka makahunahuna’g dautan.  -Tito Miguel-

Magpatambag ka? Ipada kang Tito Miguel: 0991-318-9366