Taxi drivers nihangyo sa pagsuspenso sa pag-isyu og prangkisa sa TNVS

CEBU, Philippines — Liboan ka drayber sa taxi sa Metro Cebu nihangyo sa nasudnong pangagamhanan ug sa mga regulator sa transportasyon nga suspendihon ang pag-isyu sa dugang nga 3,000 ka prangkisa alang sa Transport Network Vehicle Service (TNVS) ug mga electric taxi sa Cebu ug nagpasidaan nga ang padayon nga pagdaghan sa mga unit sa transportasyon mahimong mopasamot pa sa ilang nagkagamay nga kita.

Sa ilang petisyon, ang Cebu Group of Taxi Drivers Inc. gipangulohan sa ilang presidente nga si Archie Lou Valencia nihangyo kang Presidente Ferdinand Marcos, Jr.; Acting Secretary sa Department of Transportation nga si Giovanni Lopez; LTFRB Chairperson Vigor Mendoza II; LTFRB-7 Director Abosamen Matuan; Chairperson sa House Committee on Transportation Franz Pumaren; Senate Committee on Public Services Chairperson Raffy Tulfo ug uban pa’ng opisyales sa gobiyerno nga hunongon ang pag-isyu og dugang nga mga prangkisa sa Metro Cebu.

Partikular nga gihangyo sa grupo ang pagsuspenso sa LTFRB Memorandum Circular No. 2026-037 nga nagtugot sa 1,000 ka dugang electric taxi franchises ug sa LTFRB Board Resolution No. 079, Series of 2026, nga nagtugot sa pag-isyu sa 2,000 ka dugang nga TNVS franchises sa Metro Cebu.

Matud sa mga drayber nga nakaduso na sila og pormal nga pagsupak ngadto sa LTFRB, nagpabilin silang hilom sa mga niaging pagpalapad sa industriya sa transportasyon tungod kay nakatutok sila sa pagpanginabuhi ug pagsuporta sa ilang mga pamilya.

Apan ang ilang kahilom dili angay hubaron nga pagdawat sa mga polisiya nga ilang gituohan nga makadaot sa ilang panginabuhian.

Gipadayag sa grupo nga daghang drayber sa taxi nga kaniadto makakita og P800 hangtud sa P1,000 kada adlaw apan karon makadala na lang og P300 hangtud  saP500 bisan pa sa pagpamasada sulod sa 10 ngadto sa 12 ka oras o labaw pa matag adlaw.

Matud sa mga drayber nga padayon nila’ng gipas-an ang mga gasto alang sa gasolina, pagmentinar sa sakyanan, bayranan sa utilities, gasto sa eskwela ug uban pa’ng panginahanglanon sa panimalay diin ang uban halos dili na igo ang ilang kita aron masuportahan ang ilang mga pamilya.

Nagtapok ang mga miyembro sa Cebu Group of Taxi Drivers Inc. kagahapon atol sa ilang unang general assembly alang sa 2026 diin pormal nilang gipirmahan ang petisyon ug gipadayag pag-usab ang ilang pagsupak sa dugang nga mga prangkisa.

Lakip sa mga kabalaka nga gipadayag sa mga drayber mao ang giingong sobra nga gidaghanon sa TNVS units, taxi ug electric taxi sa Metro Cebu.  Gipadayag usab sa grupo ang ilang kasagmuyo sa giingong pagkalangan sa pagpagawas sa fuel subsidies alang sa mga drayber sa taxi ug giingong ang TNVS operators ug mga trabahante gikan sa ubang sektor sa transportasyon nakadawat na og ayuda.  BDB BANAT NEWS