Bimby moatiman kang Josh

CEBU, Philippines — Dunay kondisyon si Bimby Aquino sa pagpili sa iyang mapangasawa puhon , nga kinahanglan modawat sa iyang magulang nga si Josh. Gisaad ni Bimby nga atimanon gyud niya si Josh sa panahon nga mawala na ang ilang inahan nga si Kris Aquino. “I will only marry a girl who can accept Kuya, because I know one day when Mama is gone, I will take care of him,” saysay pa Bimby atol sa interview niini ngadto kang Boy Abunda.

Dili makarampa

Gikatahong dili makasalmot  ang unom ka mga representante sa unom ka nasod sa Southeast Asia sa ika-75 nga edisyon sa Miss Universe tungod sa nagpadayong kasungian tali sa pageant executives nga nag-ugat sa isyu sa prangkisa. Ang mga representante nga dili makaapil kay nagikan sa Thailand, Vietnam, Indonesia, Malaysia, Singapore ug Laos.Gikatakdang ipahigayon ang coronation night sa Miss Universe 2026 sa Puerto Rico karong Nobyembre 24.

Wala mopatim-aw sa NBI

Wala motambong si Tito P sa imbitasyon sa National Bureau of Investigation (NBI) sa niaging adlaw ug gikatarungan niya ang kahimtang sa iyang mental health.Ang imbitasyon sa NBI kay may kalabotan sa usa ka episode sa podcast nga Machong Chismisan, diin gibugalbugalan  ni Tito P si Josh Aquino. Samtang gihimo ang maong komento, makita usab nga mikatawa ang ubang mga host sa maong podcast 

Marian, molugwa sa GGV

Sa labing ubang higayon, gihimong special guest ang Kapuso Primetime Queen nga si Marian Rivera sa programang “Gandang Gabi Vice” kauban ang Phenomenal Unkabogable Superstar Vice Ganda karong Domingo, Oktubre 25.

Gawas sa ilang kataw-anan nga panagbinayloay og mga komento, hisgotan usab sa aktres ang iyang pagsugod sa showbiz ug tubagon ang nagkainit nga mga chismis kabahin kaniya.

Ipaambit usab ni Marian ang kasikas sa pelikulang “Remember” sa Star Cinema, nga ipasalida sa mga sinehan karong Nobyembre 11.

Kauban ni Marian sa maong pelikula ang iyang bana nga si Dingdong Dantes, ubos sa direksiyon ni Mae Cruz-Alviar.