Mayor Archival nipaila sa bag-ong hepe sa CCPO
CEBU, Philippines — Gipaila-ila ni Cebu City Mayor Nestor Archival ang bag-ong hepe sa Cebu City Police Office (CCPO) nga si Police Colonel Ricky C. Sumalde kinsa mao ang mohulip kang Police Colonel George Ylanan.
Sa press conference kagahapon, Hunyo 29, gisaysay ni Archival nga ibalhin si Ylanan ngadto sa Police Regional Office-Central Visayas (PRO-7) isip hepe sa Comptrollership Division.
Base sa Special Order nga gipirmahan ni Police Brigadier General Jaysen C. De Guzman pinaagi kang PLt. Gen. Neri Vincent Ignacio, naggikan si Sumalde sa National Capital Region Police Office (NCRPO) ug gi-reassign ngadto sa PRO-7 niadtong Hunyo 25, 2026, apan gitudlo kini dayon isip City Director sa CCPO niadtong Hunyo 26.
Si Sumalde usa ka miyembro sa PNPA "Sinag-Laya" Class of 2002 ug napromote isip Police Colonel niadtong Marso 2026 atol sa conferment rites sa Camp Bagong Diwa sa Taguig City. Sa wala pa ang iyang reassignment, nagsilbi kini isip Force Commander sa District Mobile Force Battalion ubos sa Southern Police District.
Atol sa courtesy call, gihatagan ni Archival og token of appreciation si Ylanan isip pasalamat sa pito ka buwan nga nangalagad sa CCPO. Giawhag sab ni Ylanan ang lokal nga kagamhanan nga ipadayon ang suporta nga iyang nadawat ngadto sa mopuli kaniya.
Gipadayag usab nila Archival ug Konsehal Paul Labra II ang ilang suporta kang Sumalde ug malaumon kini nga mapadayon ug mapalambo pa ang mga nasugdan nga proyekto ni Ylanan sa pagmintinar sa kahapsay ug kalinaw sa siyudad.
Sa habig ni Sumalde, mapasalamaton kini sa mainitong pagdawat kaniya ug misaad sab kini nga buhaton niya ang tanan aron mapadayon ang mga nahimo sa iyang gisundan. Andam sab si Sumalde nga kat-unon ang binisaya nga pinulungan aron nga mas masabtan pa niya ang mga Sugbuanon.
Giangkon ni Archival nga wala pa gyud niya personal nga nakahinabi Sumalde, apan andam kini nga makighimamat kauban si Ylanan aron masiguro ang hapsay nga turnover ug mapadayon ang programa sa siyudad. (BANAT NEWS)
- Latest
