Order nga inasal gikuha kay gigutom

CEBU, Philippines — Gidakop ang usa ka 33-anyos nga lalake human nanguha matud pa og manok inasal ug ubang pagkaon sa usa ka kan-anan sulod sa usa ka mall sa Fuente Osmeña, Barangay Sta. Cruz, Siyudad sa Sugbo niadtong Sabado sa hapon,  Disyembre 21, 2024.

Ang nadakpan mao si alyas Mark, 33 anyos, lumad nga taga 935 Roxas Street, Surigao City, Surigao Del Norte.  Gikuha sa dinakpan ang duha ka buok palabok ug duha ka buok chicken inasal ingon man upat ka buok halo-halo nga ang tanan nagkantidad og P999.

Gidala ang suspetsado sa Abellana Police Station human kini nasakpan nga nanguha sa maong mga pagkaon. Ang maong mga pagkaon temporaryo nga gibutang sa take area sa maong kan-anan ug gipaabot nalang nga kuhaon sa usa ka delivery rider dihang ang suspek nikuha niini ug nigawas sa kan-anan.

Maayo nalang ang supervisor nakabantay ug gigukod ang suspek sa gawas hangtud na- corner ug gidakop.  Na-recover sa kapulisan ang mga items.

Matod ni Police Captain Mark Eric Papong, kaonon unta sa suspek ang mga pagkaon kay gigutom. Gikatakda nga pasakaan og tukmang kaso ang suspetsado. — /IBM (BANAT NEWS)