Dobleng kalipay sa mag-amahan nga Chua atol sa Father's Day

CEBU, Philippines — Ang Sugbuanong basketball patron nga si Benedict Chua ug anak niyang si Andre miselebrar sa Father's Day sa talagsaon nga pamaagi - sud sa korte.

Ug nadoble ang kalipay sa mga Chua gumikan kay pareho silang mirehistro og double-double sa pagtuboy sa tagsa-tagsa nila ka mga koponan ngadto sa kadaogan.

Ang maguwang nga Chua mipakita og usa ka dalaygong salida sa dihang ang Yangtze Ice mibuak sa mabugnaw nilang sinugdanan uban ang 69-62 nga pagpakaging sa Magis Medical Fund sa Sacred Heart Ateneo Alumni Basketball Athletic Association (SHAABAA) Season 27 didto sa Sacred Heart School-Ateneo de Cebu (SHS-AdC) Magis Eagles Arena sa Barangay Canduman, dakbayan sa Mandaue niadtong weekend.

Si Chua, usa ka tinamod nga sportsman nga kanhi nagsilbeng presidente sa nahanaw nang Mandaue Industrial Commercial Athletic Association (MICAA), miposte og double-double nga 18 puntos ug 10 ka rebounds alang sa unang daog sa Yangtze Ice.

Gawas nga hait kaayo sa opensa diin siya mipasud og walo sa 12 niya ka itsa, si Chua midugang sab og tulo ka assists, duha ka steals, ug duha ka blocks aron tabangan ang Yangtze Ice pagpakgang sa duha ka sagunson nilang malas. Ang anak ug sangay ni Chua nga si Benedict Andre mikuha sab og atensiyon.

Si Andre, nga kanhi champion player sa SHS-AdC Magis Eagles sa Cebu Schools Athletic Foundation, Inc. (CESAFI), mihimo sab og impresyon bitbit ang 12 puntos, 10 ka rebounds, tulo ka assists, ug duha ka steals sa dihang gibugha sa Forex Xchange Batch 2018 ang Global Star Motors Batch 2020, 78-54, aron tablahon ang ilang rekord ngadto sa 2-2.

Ang mga Chua nagsamin sa karaang panultihon nga "sama sa amahan, sama sa anak".