Nausban sa trak

CEBU, Philippines — Patay ang usa ka 27-anyos nga rider human mibangga ang iyang motorsiklo sa usa ka tourist van ug pagkahuman nabanggaan na sab kini sa usa ka truck diha sa national highway sa Barangay Lugo, Borbon, Cebu, sayong buntag niadtong Huwebes, Agosto 27.

Giila sa Borbon Municipal Police Station ang biktima sa alias nga John, residente sa Barangay Lambusan, San Remigio.

Base sa inisyal nga imbestigasyon sa kapulisan, nagpadulong pa-amihanan ang tourist van samtang nagsunod sab pikas nga kasugat nga lane ang motorsiklo ug truck.

Ang tourist van gimaneho ni alias Wendel, 46, residente sa Barangay Maslog, Tabogon. Ang truck, sa laing bahin, gimaneho ni alias Elmer, 50, residente sa Barangay Sandayong Norte, Danao City. Sumala sa kapulisan, giingong misulod sa pikas lane ang motorsiklo maong nabanggaan kini sa kasugat nga tourist van nga nagpadulong sa opposite direction.

Tungod sa impact sa unang pagbangga nabalik sa iyang lane ang motorsiklo uban ang driver niini, apan nabanggaan kini sa gasunod nga truck ug naguroy og pila ka metros.

Padayon karon ang imbestigasyon sa Borbon MPS sa maong aksidente.— IBM BANAT NEWS