SHAABAA Season 29 Cebu Landmasters Batch 2003 mibira sa korona sa Division A

CEBU, Philippines — Ang Cebu Landmasters Batch 2003 mi-sweep sa ARQ Batch 2001 sa ilang best-of-three finals series uban ang impresibong 81-62 nga kadaogan sa Game 2 aron sakmiton ang kampiyonato sa Division A sa Sacred Heart Ateneo Alumni Basketball Athletic Association (SHAABAA) Season 29 niadtong Domingo, Agosto 2, didto sa Sacred Heart School-Ateneo de Cebu (SHS-AdC) Magis Eagles Arena sa Barangay Canduman, dakbayan sa Mandaue.

Ubos sa pagtimon sa bangiitan nilang coach nga si Mike Reyes, ang Batch 2003 mibugwak og nagkayong opensiba sa second half aron pag-alsa sa una nilang tropeyo sukad sila nakadaog og duha ka sagunson nga korona sa Division B niadtong 2023.

Si Justin Huang mipakita nganong siya maoy season Most Valuable Player human niya gibandera ang team ni businessman-sportsman Jose Franco Soberano ngadto sa tam-is nga kalamposan uban ang solidong double-double nga 20 puntos ug 10 ka rebounds nga iyang gisukipan og tulo ka assists ug usa ka steal.

Si Huang, nga mao sab ang Defensive Player of the Year, giduyogan sa Mythical 5 sa teammate niyang si Daryle Tan, Jason Arquisola ug Mark Hing sa Batch 2001, ug Roderick Mangubat sa Big Three Pizza Batch 1996. Lain pang tulo ka players sa Batch 2003 ang mikadlit og double figures, apil si Raymond Dennis Tan nga kausa lamang masipyat sa siyam niya ka itsa aron paghipos og 19 puntos uban ang duha ka rebounds, usa ka assist ug makapakurat nga pito ka steals.

Si Daryle Tan miamot og 16 puntos, walo ka rebounds, tulo ka assists, tulo ka steals, ug two blocks sa dalaygon kaayong salida nga naghatud kaniya sa pasidungog isip Finals MVP.

Si Dennis Lanorias midugang og 11 puntos alang sa Batch 2003, nga naalkansi og otso puntos, 20-28, sa ikaduhang kuwarter apan  milusad og madasigong resbak, 28-16, aron ilogon ang labaw, 57-50, padung sa pinal nga 10 minutos.

Nakasustinir sa ilang kainit, ang Batch 2003 misira sa duwa uban ang 24-12 rally aron ilubong ang Batch 2001 og 19 puntos. Sa kinatibuk-an, ang Batch 2003 milampaso sa Batch 2001 sa final half, 52-28.

Si Mark Hing maoy nangu sa Batch 2001 bitbit ang 13 puntos ug pito ka rebounds samtang si Carlo Villarica mitali og 11 puntos ug duha ka rebounds sa pildirong kawsa.

Nanikaysikay nang daan sa ilang opensa, ang Batch 2001 natiwasan pa sa 29 nila ka turnovers, nga gigaling sa Batch 2003 ngadto sa 28 puntos.