Walay quarrying sa Buhisan–Barete

CEBU, Philippines — Giklaro ni Buhisan Barangay Captain Gremar Barete nga walay quarrying nga nahitabo diha sa ilang barangay ug ang kasamtangang gitrabaho sa lugar mao ang usa ka road widening ug slope protection project aron mapugngan ang pagdahili sa yuta sa mga delikadong bahin sa kabukiran.

Si Barete niluwat sa maong pamahayag human sa mga pangutana ug komentaryo ni kanhi customs commissioner ug kanhi Cebu City mayoral candidate Yogi Ruiz diha diha sa social media mahitungod sa gihimo nga pagkutkot sa usa ka bahin sa barangay.

Sa iyang Facebook post, gipangutana ni Ruiz kong aduna ba’y quarry operation sa Buhisan.

Si Ruiz nipadayag sa iyang kabalaka nga posible mao kini ang hinungdan sa pagdahili sa yuta.  Matud ni Ruiz nga wala siya mosupak sa road widening apan nangayo lang kini og kasayoran kong ang kasamtangang gihimo sa barangay mao ang usa ka road widening o usa na ka lahi nga kalihokan diin nagpakita usab kini og pagkapahak sa bukid.

Apan si Barete niklaro nga walay quarry permit nga giaprobahan sa barangay ug ang gihisgotan ni Ruiz sa diha Facebook usa lang ka site development sa usa ka gamay nga subdivision nga dugay na’ng naaprobahan sa niaging administrasyon sa barangay.

Ang 5,000 square meter nga subdivision dugay na’ng naaprobahan sukad pa niadtong 1990 ug napalit na kini sa pribadong developer nga nakasiguro og kuha og Environmental Compliance Certificate (ECC) gikan sa Department of Environment and Natural Resources (DENR).

Gipasabot ni Barete nga karaaan na ang hulagway nga gigamit ni Ruiz isip basehan sa iyang post ug wala kini nagpakita sa kasamtangang sitwasyon sa lugar.

Ug ang dakong proyekto nga nagpadayon karon sa Buhisan mao ang road widening uban sa slope protection aron nga masiguro ang kaluwasan sa mga residente sa usa ka lugar nga kuyaw sa pagdahili sa yuta.

Ang proyekto gipatuman sa Department of Public Works and Highways (DPWH) nga adunay kantidad nga kapin sa P90 milyones ug naglakip sa road widening, slope protection, line canal, concreting ug mga pagpaayo sa water system nga gilaoman nga mahuman karong Disyembre 2026.

Gibutyag ni Barete nga ang proyekto napahunong kini human giisyuhan og cease-and-desist order ni Mayor Nestor Archival, Sr. tungod sa mga kabalaka sa earth-moving activities paghuman sa Bagyong Tino niadtong Nobyembre 4, 2025.

 Apan human makompleto ang mga teknikal nga rekisitos ug mga dokumentong gipangayo sa DENR ug Mines and Geosciences Bureau (MGB) gilibkas na ang CDO ug gitugotan na kini nga mopadayon niadtong Pebrero 19, 2026. (BANAT NEWS)