Illegal parking sa Guadalupe Elem. School Gironda

CEBU, Philippines — Upat ka motorsiklo ang gi-impound atol sa clearing operations nga gipahigayon sa Cebu City Transportation Office (CCTO) batok sa ilegal nga pag-parking duol sa Guadalupe Elementary School ug Guadalupe National High School kagahapong adlawa, Hulyo 20, 2026.

Ang operasyon gilusad human makadawat og reklamo ang buhatan ni Mayor Nestor Archival kabahin sa mga pribadong sakyanan ug motor nga nagbabag sa agianan sa mga tawo o sidewalk.

Atol sa operasyon, nagkapuliki ang mga tagiya nga masalbar ilang mga motor aron nga dili maapil og impound.

Ang upat nga na-impound gi-isyuhan og citation tickets nga naay multang P2,500. Kinahanglan niini nga husayon ngadto sa buhatan sa CCTO.  Ang reklamante nga wala motug-an sa pangalan miingon nga delikado kaayo ang maong sitwasyon ilabi na sa mga tinun-an ug mga senior citizen nga mapugos paglabang sa dalan tungod kay dili na makaagi sa sidewalk.

Gipasanginlan sab sa nagreklamo ang kawalay aksyon sa barangay bisan og makadaghan na silang nireklamo bahin ani.

Gipasalig sa CCTO nga ipadayon nila ang ilang pag-monitor sa maong dapit ug uban pang mga eskwelahan sa siyudad aron masiguro nga mapatuman ang balaod ug walay sakyanan nga magbabag sa mga agianan sa publiko. (BANAT NEWS)