Nagsige’g panghasol gipusil

CEBU, Philippines — Usa ka 33-anyos nga lalaki ang naangol human gituhoang gipusil sa iyang silingan atol sa lalis nga nagsugod samtang nagdula og online "scatter" gambling ang suspetsado sayong buntag sa Domingo, Hulyo 19, sa Sitio Malipayon, Barangay Inayawan, Cebu City.

Giila ang suspetsado nga si alyas "Roma," 28, residente sa maong lugar. Ang biktima mao si alyas "Joe," 33, residente sa Sitio Malipayon.

Base sa imbestigasyon sa kapulisan, mga alas 3:30 sa buntag nahitabo ang insidente samtang gaduwa og scatter sa iyang cellphone ang suspetsado.

Matud pa giduol kini sa biktima nga nagsige og panghasol pangayo og balato kay sige man og daog ang suspek. Gibadlong kini sa suspek hangtod nga misangpot sa sumbagay og pagpamusil.

Naay mga saksi nga nitug-an nga ang biktima maoy unang mihagit og komprontasyon ug siya sab ang unang nisumbag sa nawong sa suspek nga misangpot sa ilang sinumbagay.

Atol sa ilang panag-away gikuha sa suspetsado ang usa ka .38 caliber nga pusil ug gipusil ang biktima nga naigo sa wala nga bukton.

Giingong usban pa unta kini’g pusil apan napugngan kini sa mga tawo sa lugar og nailog ang armas ug gilabay nila palayo niya hinungdan nga midagan ang suspetsado pahilayo.

Gilusad dayon sa mga operatiba sa Inayawan Police Station 7, ubos sa pagpanguna ni PCPT Troy John A. Lalamunan, ang hot pursuit operation paglabay sa pipila ka oras nadakpan kini ag suspetsado.

Na-rekober sa kapulisan ang .38 caliber nga pusil nga gigamit sa insidente isip ebidensya.

Ang biktima gidala sa Cebu City Medical Center (CCMC) diin gipailalom siya sa tambal ug giingong luwas ang iyang kahimtang. — /IBM (BANAT NEWS)