EDITORYAL - Unggoy ang mga Pilipino?

Usa ka dakong insulto sa tanang mga Pilipino ang gi-post nga AI generated clips sa China Daily adtong Hulyo 10 nga gipakatap dinhi sa nasud karong bulana samtang ang nasud nagsaulog sa ika-napulo ka tuig nga kasumaran sa kadaugan diha sa South China Sea.

Ang maong AI generated video clips, nagpakita sa usa ka unggoy nga nagsul-ob og Barong Tagalog ug kawo nga Sayap/Anahaw.

Ang mga clips naglakip sa unggoy nga gibombahan og tubig sa water cannon; Giitoy-itoy sa Amerika ug Japan; ug uban pa nga mahulagway nga pagpakita lang nga walay respeto sa mga Pilipino ang nagbuhat niini.

Ang China Daily gipanag-iya ug kontrolado sa komunistang gobiyerno sa China ug mao ni ang ilang gigamit pagsabwag sa ilang mga polisiya dili lang didto sa ilang nasud kondili sa tibuok kalibotan pud. Nagpasabot lang kini nga kaning gibuhat sa China Daily, may bendisyon gikan mismo sa gobiyerno sa China. Nagpasabot lang sab kini nga mismo ang gobiyerno sa China walay respeto natong mga Pilipino.

Ang post gihulagway sa Department of Foreign Affairs nga ‘racists’ ug walay lugar sa mga publikong diskurso ang pagkawalay maayong pamatasan sama sa gibuhat sa maong pamantalaan.

Abi kay nalupig sila sa gubat sa impormasyon tungod sa kanunay nga pag-expose sa mga Pilipino sa mga dautang gipangbuhat sa China diha sa West Philippine Sea, hasta ang baratilyong pamaagi para lang makabawos ilaha ng giibuhat.

Karong bulana, Hulyo, giselebrar sa Pilipinas ang 2016 Arbitral Ruling nga nag invalidate sa walay legal nga basihang pagpangangkon sa China sa tibuok South China Sea diin nahimutang ang West Philippine Sea.

Ang WPS nasulog sa 200 nautical miles exclusive economic zone sa Pilipinas ubos sa United Nations Convention on the Law of the Sea. Ubos sa maong balaod, ang Pilipinas lamang maoy adunay ekslusibong katungod paggamit, pagkuha, pag-ugmad ug pagprotektar sa tanang resources sa lugar.

Walay gusto og gubat o magkagiyera, pero sa mga ingon niining taktika sa China nga murag og gihinay-hinayan nila og hiwa sama sa usa ka pizza ang  SCS gikan sa mga claimant countries sama sa Vietnam, Pilipinas, Brunei, Malaysia ug Taiwan, mosamot gyud ang  tensiyon aning dapita.