Titan Ultra binangga ng NLEX

MANILA, Philippines — Pinakain ng NLEX ng alikabok ang Titan Ultra, 135-100, upang manatiling walang galos sa PBA Season 50 Governors’ Cup kahapon sa Ynares Sports Center sa Antipolo.

Nahirapan pa sa first quarter ang Road Warriors subalit bumulusok sa ikalawang bahagi at hindi na prumeno pa tungo sa pambihirang 35 puntos na tagumpay.

Ito na ang ikatlong sunod na tagumpay ng Road Warriors sa Group A para sa maalab na simula sa ilalim ng bagong head coach na si Jimmy Alapag matapos ding tambakan ang guest team na Macau Giant Pandas, 114-75, at tumakas mula sa Terrafirma, 101-100.

“I told the guys as we go along in the conference, our growth will be a big key. Last game against Terrafirma, we had to give them credit but tonight, we did a much better job in staying consistent with our game plan both offensively and defensively,” ani Alapag na unbeaten pa sa kanyang PBA head coaching debut.

“We’re getting a lot of contributions from different guys. Again, we’re really happy with the effort form the entire group.”

Nagliyab sa 30 puntos, 9 rebounds at 6 na assists si Schonny Winston habang may 29 puntos, 7 rebounds at 4 assists din si Robert Bolick para sa Road Warriors.

Sapat na ito upang hindi masyadong kailanganin ng NLEX ang pagputok ni import DeQuan Jones bagama’t may solido pa ring 22 puntos at 6 rebounds sa 31 minutong aksyon lang.

Abante lang ang NLEX ng 30-23 sa first quarter bago rumatsada sa second, 31-19, upang makapagtayo ng 18-puntos na bentahe na hindi na nila binitawan tampok pa ang madiin na 38-18 panapos tungo sa tambakang panalo.

Sa unang pagkakataon ay may nakasamang import ang Titan Ultra sa katauhan ni Tirrell Brown na naglista ng 27 puntos at 10 rebounds na double-double subalit kapos pa rin upang maakay sa unang panalo ang mga tropa ni coach Rensy Bajar.

Laglag ang Giant Riders sa 0-3 kartada.