Paggamit sa renewable energy pabiling giduso sa CERA

CEBU, Philippines — Gi-awhag sa Cebu Electricity Rights Advocates (CERA) ang Energy Regulatory Commission (ERC) nga paspasan ang pag-apruba ug pagpatuman sa gisugyot nga Off-Grid Renewable Energy Distributed Energy Resources (RE-DER) Rules, nga matud pa niini makatabang sa pagpaminus sa gasto sa kuryente, pagpauswag sa power generation sa mga off-grid areas, ug paghatag og mas maayong serbisyo sa mga konsumidor.

Si CERA Lead Convenor Nathaniel Chua sa usa ka press statement miingon nga ang gisugyot nga mga lagda makausab sa sistema sa paghimo og elektrisidad sa missionary areas pinaagi sa paggamit sa renewable energy isip alternatibo sa mahal nga diesel-powered power plants.

Matud ni Chua, sulod sa daghang katuigan ang mga konsumidor sa Pilipinas maoy nagpas-an sa gasto sa usa ka karaan ug mahal nga sistema nga nagsalig sa diesel generation sa mga off-grid areas.

Miingon siya nga ang mga lagda sa ERC mahimong higayon aron ma-modernisar ang missionary electrification pinaagi sa mas limpyo ug mas barato nga enerhiya, apan kinahanglan masiguro nga ang mga reporma mosangpot sa mas ubos nga bayranan sa kuryente ug mas maayong serbisyo.

Sumala sa CERA, ang mas halapad nga paggamit sa distributed renewable energy resources sama sa solar ug wind power makapamenos sa pagsalig sa diesel, makapakunhod sa gasto sa paghimo og elektrisidad, ug makapamenos sa panginahanglan sa subsidiya ubos sa UC-ME.

Gidugang sa grupo nga ang mga lagda makadasig usab sa electric cooperatives ug distribution utilities sa missionary areas nga i-modernisar ang ilang operasyon pinaagi sa paggamit sa mas limpyo ug episyenteng teknolohiya sa enerhiya.

Ang pag-abli sa sektor ngadto sa mga kwalipikadong renewable energy providers makatabang usab sa pagpauswag sa kompetisyon, kasaligan sa serbisyo, ug episyensya sa operasyon.

Matud ni Chua nga ang pagbalhin ngadto sa renewable energy dili lamang usa ka lakang alang sa kalikopan apan usa usab ka paagi sa pagpanalipod sa mga konsumidor.

Matud niya nga matag pisong matigom pinaagi sa mas episyenteng power generation makatabang aron mahimong mas barato ang kuryente alang sa mga panimalay ug negosyo.

Sa laing bahin, misang-at si Senador Risa Hontiveros og resolusyon nga naghangyo og imbestigasyon sa mga polisiya sa ERC sa pagpanalipod sa mga konsumidor human sa mga taho sa sayop nga meter readings nga miresulta sa sayop nga billing sa kuryente, samtang nagpadayon ang pagsaka sa presyo sa kuryente.

Matud ni Hontiveros, adunay mandato ang ERC sa pagpanalipod sa mga konsumidor sa kuryente apan ang pipila sa kasamtangang mga polisiya niini mahimong nagpas-an sa palas-anon ngadto sa mismong mga konsumidor.  MEL BANAT NEWS