Nilugos sa tindera, nakuha sa CCTV

CEBU, Philippines — Nailhan na sa Cebu City Police Office (CCPO) ang suspek sa giingong pagpanglugos sa usa ka babayeng empleyado sa sulod sa usa ka water refilling station nga ginahimo sad nga ilimnanan matag gabii diha sa Barangay Basak San Nicolas.

Matud ni PLt. Col. Franc Rudolf Oriol, Deputy City Director for Administration sa CCPO, nakahatag na og affidavit ang biktima ug anaa na sa katapusang bahin sa pag-andam sa kasong rape batok sa suspek ang kapolisan.

Nagpadayon usab ang hot pursuit operation aron madakpan ang suspek nga hangtod karon nagtagotago pa sa mga awtoridad.

Sa inisyal nga imbestigasyon, nahitabo ang insidente sa kaadlawon samtang padulong na manirado ang establisamento..

Ang biktima, nga empleyado sa maong tindahan nahibilin sulod uban sa usa ka lalaking kustomer nga giingong nagpabilin pa sa lugar.

Sa dihang namingaw na ang tanan, gikatahong gihulga sa suspek ang biktima pinaagi sa pagtion og kutsilyo ug dihadiha gilugos niya kini.

Gikompirma usab sa kapulisan nga dako ang natabang sa CCTV footage sa establisamento sa pag-ila sa suspek.

Sumala sa CCPO, igo na ang ilang nakolektang ebidensya ug ang ilang prayoridad karon mao ang pagdakop sa suspek aron maatubang niini ang kasong ipasaka batok kaniya.

Gipasabot usab sa kapulisan nga walay bisan unsang kabtangan nga gikawat atol sa insidente, busa ang kasong giandam batok sa suspek mao ang rape.

Samtang nagpadayon ang imbestigasyon, gihangyo sa CCPO ang mga tag-iya sa mga negosyo nga siguruhong naglihok kanunay ang ilang mga CCTV camera aron makatabang sa pag-ila sa mga responsable sa mga krimen nga mahitabo sulod sa ilang establisemento.

Giawhag usab sa kapulisan ang publiko nga magmatngon ug daling motaho sa mga awtoridad kon adunay makita nga kadudahang kalihokan. (BANAT NEWS)