Australia Boomers mikulata sa Gilas

CEBU, Philippines — Ang Gilas Pilipinas nakatilaw og mapait nga kapildihan batok sa gamhanang Australia Boombers,   92-49, sa katapusan nilang duwa sa unang hugna sa FIBA World Cup Asian qualifiers niadtong Lunes sa gabii, Hulyo 6, didto sa Perth Arena.

Dehado nang daan, napiangan pa og samot ang Gilas tungod kay wala makaduwa ang na-injured nilang sinaligan nga si Justin Brownlee.

Wala na makabawi pa ang Gilas sukad sila nabiyaan og 19 puntos human sa na-unang 10 minutos sa aksiyon.

Nindot man tuod ang gipakita sa mga Pinoy sa ikaduhang kuwarter apan padayon silang gikulata sa Boombers sa second half nga miresulta sa 43 puntos nga demolisyon.

Way bisan usa ka player sa Gilas ang mikadlit og double figures.

Si Dwight Ramos mihipos og nuybe puntos, si June Mar Fajardo adunay otso puntos ug walo ka rebounds samtang si Mike Philips mibira og 12 ka rebounds alang sa Gilas, nga nahisukamod sa ikaupat ka sunod-sunod nga higayon ug magbitbit og 2-4 rekord karong sa ikaduhang hugna karong Agosto.

Ang six-time NBL MVP nga si Bryce Cotton maoy nangu sa Australia uban ang 21 puntos.

Si Tyrese Proctor, nga sakop sa Cleveland Cavaliers sa NBA, midugang og 16 puntos alang sa Boomers, nga mikumpleto og dalayong 6-0 sweep sa Group A sa unang hugna.