2 obrero nilamon ng lupa
MANILA, Philippines — Dalawa sa limang construction worker na nilamon ng lupa ang nasawi nang lamunin ng 18-metrong lalim na hukay sa isang water pipeline project sa Barangay Pamplona II, Las Piñas City, nitong Linggo ng hapon.
Unang nailigtas ng rescue teams, alas-4:30 ng hapon ang tatlo sa Aquarius St., habang ang dalawa pang na-trap ay patay na nang makuha sa hukay nitong Lunes.
“Yung dalawa na worker nag-survive naman po. Hindi naman agad na-trap. Then ‘yung isa po dinala po sa ospital. Sugatan po siya. Then meron po remaining two na na-trap but ito po naman na-recover. Mga sinawing palad na po ito, sir. Dalawa po ang patay dito, sir, sa insidenteng ito,” wika ni Las Piñas City Police assistant police chief for operations, Lt. Colonel Teoson Rosarito.
Kinumpirma rin ni Bureau of Fire Protection (BFP)-Las Piñas City Fire Marshal, Supt. Sonny Carlo ang dalawang biktima ay wala ng buhay nang makuha, alas-6:30 ng umaga ng Lunes.
Kinumpirma ng Maynilad na sinuspinde na nila kaagad ang paghuhukay dahil sa insidente at nakipag-ugnayan din sa BFP, local disaster response unit at barangay na nakasasakop sa lugar.
Naapektuhan din ang water services sa lugar na konektado sa nasabing pipeline.
- Latest
