Cebu Safe Schools Program gilusad sa probinsiya

CEBU, Philippines — Gilusad sa kagamhanan sa Probinsiya sa Sugbo ang Cebu Safe Schools Program human gipirmahan ni Gobernador Pamela Baricuatro ang Executive Order No. 35 aron mapalig-on ang siguridad ug mapugngan ang mga dili maayong insidente diha sulod sa mga eskwelahan sa tibuok probinsiya.

Ang maong lakang gisunod sa emergency meeting nga gipatawag sa gobernador uban sa Provincial Peace and Order Council (PPOC) isip tubag sa bag-ohay lang nga duguong insidente nga nahitabo sa usa ka eskwelahan ngadto sa Tacloban City.

Lakip sa mga aprobahan sa PPOC ang pagpatuman sa information ug intervention programs alang sa mga magtutudlo, ginikanan ug mga estudyante kabahin sa crime prevention, school safety, anti-bullying, gangsterism, extremism ug radicalization.

Gimandoan ni Baricuatro ang Provincial Social Welfare and Development Office (PSWDO) kauban ang Provincial Health Office ug Provincial Youth Development Office sa paghimo og province wide anti-bullying hotline aron dali nga ma-report ang mga kaso sa pagpangdaog-daog diha sa mga tunghaan. Gisugyot sa konseho nga ipabutang sa tanang eskwelahan ang mga emergency hotline numbers aron sayon nga makapangayo og tabang ang mga estudyante, ginikanan ug mga magtutudlo kon adunay emerhensiya.

Girekomenda sa PPOC nga apilon sa Cebu Provincial School Board ang mga representante gikan sa Philippine National Police, Armed Forces of the Philippines ug Bureau of Jail Management and Penology aron mas mapalig-on ang koordinasyon sa siguridad sa mga eskwelahan.

Samtang si Police Colonel Abubakar Udang Mangelen, Jr., direktor sa Cebu Provincial Police Office nagkanayon nga karon aduna na’y 2,516 ka security personnel nga gibutang sa 1,567 ka eskwelahan ug unibersidad sa probinsiya.

Gilangkuban kini sa security guards, Barangay Peacekeeping Action Teams ug uban pa’ng security forces nga nagtabang sa pagmentinar sa kahapsay ug kalinaw sulod ug gawas sa mga tunghaan.

Subay sa nahisgutang EO gitukod ang Cebu Safe Schools Committee nga maoy mangulo sa pagpatuman sa programa ug paghimo sa komprehensibong Cebu Safe Schools Plan sulod sa 90 ka adlaw.

Samtang, si Senador JV Ejercito nipadayag nga bukas siya sa posibilidad nga usbon ang balaod sa minimum age of criminal liability ug ipaubos kini ngadto sa 12 o bisan 10-anyos basta suportado kini sa assessment sa mga eksperto kabahin sa kahibalo o discernment sa bata.

Dugang ni Ejercito nga dugay na’ng gigamit sa mga kriminal ang mga menor de edad tungod kay nahibalo sila’ng dili kini mahimong kasohan ubos sa kasamtangang balaod hinungdan nga iyang giingong ang maong isyu angay na’ng hisgotan pag-usab. BDB BANAT NEWS