Nataypan sa higala

Dear Tito Miguel,

Maayong adlaw,  ako diay si Dave, 26 anyos, taga Mandaue City .

Aduna ko’y  amiga nga si Kaye. Buotan siya, grabe kaayo ko ka pinangga , ug klaro kaayo nga espesyal ang iyang pagtan-aw kanako. Daghan na pud  ang nakabantay nga gusto gyud ko niya. Sa tinoud  lang, wala ko’y  dautang ikasulti bahin niya kay maayo siyang pagkatawo.

Dunay soud nako nga higala nga nisulti nako nga dunay gusto si Kaye kanako. Apan ang problema, bisan unsaon nako, wala gyud ko’y  romantic feelings ngadto  kaniya. Giisip nako siya nga maayong amiga ug diha ra kutob. Nahadlok ko nga basin masakitan siya kung isulti nako ang tinuod. Mahadlok usab ko nga basin mausab ang among panaghigalaay ug basin isipon niya nga gidula-dulaan ko siya. Tito Miguel , unsa man ang akong buhaton? Padayon ba kong maghilom aron dili siya masakitan, o kinahanglan ba nako siyang istoryahon ug isulti ang tinuod bisan pa og lisod? Unsaon nako pagsulti niini nga dili siya masakitan pag-ayo ug aron mapadayon gihapon ang among respeto sa usa’g usa? — DAVE

Dave,

Suod  man gyud  mo, istoryahi siya sa imong plano sa kinabuhi. Sa maong paagi, malikayan nimo nga direkta nimo siya balibaran. Gani, wa ka’y angay ibalibad ka’y wala pa man siya’y gipangayo. Klaroha lang asa siya dapit sa imong dughan.

Aron dili bakikaw, ingna duna na ka’y giganahan nga laing babaye, apan wala pa kay  plano manguyab niya. Kay lagi daghan pa ka’g plano sa kinabuhi. Sa laktod, dili pa nimo prayoridad ang love life. Sa maong paagi, siya makaamgo nga dili ka andam manguyab. Kun manguyab man gani, dili gihapon siya.

Paniid sa iyang reaksyon. Makita gyud dayon na nimo sa iyang nawong kun nasakitan. Kun nasagmuyo, ingna dayon pasensiya na nga nakahisgot ka sa imong mga plano, personal na man unta kaayo.

Kun mora la’g wala niya, lagmit maayo lang siya modala. Pangutan-a kabahin sa iyang lovelife. Ingna ka’y buotan ug guapa man siya, naa gyu'y nanguyab niya. Kun motubag wala, ingna paabot lang. Kun moingon naa siya’y naganahan apan dili mutual ilang gibati, lagmit ikaw ang gipasabot. Ingna dayon kun dili mutual, dili sila para sa usa’g usa. Apan sigurado duna pa’y moabot nga para niya. Lagmit dili na moingon ikaw unta, kay  naunhan na man nimo og  balibad.

Human sa inyong istorya, paniid kun kanimo mosikit pa ba. Kun mo-distansiya na, nasakitan siya ug gidawat na niya nga wala ka makagusto niya. Anugon, pero ang tinuod dili ka mawagtanga’g higala, ka’y ang mauyab ka maoy gusto niya.     —Tito Miguel

Magpatambag ka? Ipada kang Tito Miguel: 0991-318-9366