Andaya binitawan ng Flying Titans
MANILA, Philippines — Matapos kunin si veteran setter Ivy Perez ay binitawan kahapon ng Choco Mucho si Fil-American playmaker Tia Andaya ilang linggo bago magbukas ang 2026 Premier Volleyball League (PVL) On Tour.
Sa kanyang Instagram post ay nagpasalamat ang 25-anyos na si Andaya sa isang taon niyang paglalaro para sa Flying Titans.
“It truly was an unforgettable journey. The road wasn’t always smooth, but I wouldn’t change it for the world. Thank you all for your support and love these past few years whether it was with Choco or Alas, it was an honor to play both with and for you all,” ani Andaya.
Kinuha bilang No. 7 overall pick ng Choco Mucho sa 2025 PVL Rookie Draft, nagsilbing backup si Andaya kina veteran setters Deanna Wong at Alina Bicar sa nakaraang dalawang kumperensya.
Naglaro si Andaya para sa Gonzaga University at Central Washington University sa US NCAA bago naging miyembro ng Alas Pilipinas sa ilalim ni dating head coach Jorge Souza de Brito.
Bukod sa 31-anyos na si Perez, nasa setter rotation din ng Flying Titans ni coach Dante Alinsunurin si 2026 PVL Draft No. 3 overall pick Tin Ubaldo ng Far Eastern University Lady Tamaraws.
Magsisimula ang PVL On Tour sa Hulyo 8 sa Ilagan City, Isabela tampok ang salpukan ng Creamline at Nxled sa alas-6:30 ng gabi at laban ng ZUS Coffee at Akari sa alas-4 ng hapon.
- Latest
