Carnapper nasikop sa checkpoint

CEBU, Philippines — Sikop ang usa ka 27-anyos nga lalaki human nasakpi sa kapolisan nga nagmaneho og Honda Click 125 nga gi-report nga carnapped atol sa checkpoint operation diha sa Barangay Poblacion, Lungsod sa Pinamungajan niadtong Hunyo 14, 2026.

Base sa taho sa Pinamungajan Municipal Police Station nga alas 3:10 sa hapon dihang niduol sa checkpoint ang rehistradong tag-iya sa maong motorsiklo ug nitaho nga adunay tawo nga naggamit sa iyang Honda Click 125 nga una nang gi-report nga carnapped sa Dakbayan sa Sugbo.

Gikompirma sa mga awtoridad nga ang maong insidente natala na sa Police Station 6 sa Cebu City Police Office ug adunay kaso nga nasang-at na sa City Prosecutor’s Office.

Human sa verification, nakit-an sa mga polis ang suspetsado nga nagmaneho sa maong motorsiklo diha sa Sitio Dakit, Barangay Poblacion ug gigukod kini sa mga operatiba  aron mabawi ang motorsiklo.

Atol sa paggukod nawad-an og kontrol ang suspetsado sa motorsiklo human kini nabangga sa kanal daplin sa karsada ug natumba ug gibiyaan ang motorsiklo.

Gikataho nga sa pag-ikyas sa suspetsado gilabay niini ang kalibre .38 nga revolver nga adunay tulo ka buhing bala nga na-recover sa mga operatiba.

Ang suspetsado natingkagol karon sa Pinamungjan Municipal Police Station. (BANAT NEWS)