Armas ug bala nasakmit

CEBU, Philippines — Nasikop ang usa ka 39-anyos nga lalaki ug nakuhaan og pusil ug mga bala atol sa usa ka search operation nga gipahigayon sa Argao Municipal Police Station sa Barangay Tiguib, Argao, Cebu sa buntag niadtong Hunyo 16, 2026.

Ang operasyon gipahigayon pinaagi sa Search Warrant may kalabotan sa giingong paglapas sa Republic Act No. 10591 o ang Comprehensive Firearms and Ammunition Regulation Act. Atol sa pagpatuman sa search warrant, narekober sa mga operatiba ang usa ka kalibre .357 revolver nga walay marka ug serial number, ug upat ka bala sa maong kalibre.

Tungod niini, gidakop sa mga pulis ang suspek ug gikompiska ang pusil ug mga bala nga ilang narekober.

Human sa operasyon, gidala ang suspek ug ang mga ebidensya ngadto sa Argao Municipal Police Station alang sa dokumentasyon, imbentaryo ug pagpasaka og kaso batok kaniya.

Gitambongan usab kini sa usa ka opisyal sa barangay ug sa legal nga nagpuyo sa maong balay isip mga saksi sa pagpatuman sa search warrant. IBM BANAT NEWS