Inflation rate sa Sugbo misaka ngadto sa 13.6 percent

CEBU, Philippines — Gipalig-on sa Kapitolyo sa Sugbo ang mga programa alang sa food security ug pagpaubos sa gasto sa transportasyon human narekord sa lalawigan ang 13.6 porsiyentong inflation rate niadtong Mayo 2026. Base sa datos sa Philippine Statistics Authority (PSA), misaka ang inflation rate sa Sugbo gikan sa 12.9 porsiyento niadtong Abril ngadto sa 13.6 porsiyento niadtong Mayo, nga maoy labing taas sa Central Visayas.

Matud ni Provincial Administrator Atty. Ace Durano, nakigtambayayong karon ang Kapitolyo sa PSA Central Office aron mas masabtan unsay hinungdan sa pagsaka sa presyo sa mga nag-unang palaliton sa lalawigan.

Gipasabot ni Durano nga ang duha ka labing dakong nakatampo sa taas nga inflation mao ang pagkaon ug transportasyon.

Bisan adunay lokal nga produksyon sa agrikultura, dili gihapon kini igo aron matubag ang panginahanglan sa nagkadakong populasyon ug ekonomiya sa Sugbo.

Tungod niini, kon mosaka ang gasto sa pagbiyahe ug pagdala sa mga produkto, mosaka usab ang presyo sa mga baligya sa merkado.

Alang sa Kapitolyo, ang maong mga numero nagpamatuod nga tukma ang pagtutok sa administrasyon ni Governor Pamela Baricuatro sa food security ug pagpaubos sa gasto sa transportasyon

Nasayran ang Central Visayas natala nga dunay pinakataas nga inflation rate sa 18 ka rehiyon sa nasod niadtong Mayo 2026, diin ang presyo sa mga nag-unang palaliton ug serbisyo misaka ug 10.8 porsyento, sumala sa Philippine Statistics Authority (PSA)-7.

Sa usa ka press briefing kagahapon, gi-report ni PSA-7 Officer-in-Charge Regional Director Wilma A. Pirante nga ang inflation rate sa rehiyon nagpabilin sa 10.8 porsyento nga pareho sa natala niadtong Abril 2026. Apan mas taas kini kumpara sa 0.9 porsyento nga inflation rate niadtong Mayo 2025.

Ang Central Visayas gisundan sa Caraga Region, nga nagtala ug 9.4 porsyento nga inflation rate niadtong Mayo 2026.

Giingon ni Pirante nga ang pagkaon ug non-alcoholic beverages mao gihapon ang pinakadako nga nakatampo sa kinatibuk-ang inflation sa rehiyon, nga mikabat ug 5.93 percentage points ug adunay 15.2 porsyento nga inflation rate. Sa mga pagkaon, ang cereals ug cereal products ang pinakadako nga nakatampo sa overall inflation. Gisundan kini sa isda ug uban pang seafood, samtang ang mga utanon, tubers, plantains, cooking bananas ug pulses nakatampo ug 1.33 percentage points human mosaka ang presyo ug 54 porsyento. MEL BANAT NEWS