Wealth tax gisugyot

CEBU, Philippines — Ang grupo sa mamumuo ug mga progresibong organisasyon sa Central Visayas misupak sa sugyot ni Senador Francis “Chiz” Escudero nga palambuon ang eksplorasyon sa lokal nga reserba sa coal sa nasud, aron makadugang sa kita sa gobyerno.

Gisugyot sa grupo nga himoon ang pagpatuman sa wealth tax, pagpalig-on sa koleksyon sa buhis, ug pagsulbad sa korapsyon.

Una nang giawhag ni Escudero ang nasudnong gobyerno nga pahimuslan ang mga dili buhisan nga tinubdan sa kita imbes nga magpahamtang og bag-ong buhis.

Matud ni Escudero, ang pagpasubasta sa mga kasabotan sa eksplorasyon ug produksyon sa mga coal-bearing areas sa Cagayan, Isabela, South Cotabato, ug Sarangani mahimong makahatag og dakong kita sa gobyerno.

Apan si Dennis Derige, tigpamaba sa Partido Manggagawa-Cebu, miingon nga ang maong sugyot supak sa global nga trend nga naglikay na sa coal isip tinubdan sa enerhiya.

Imbes nga coal, giingon niya nga dugay nang gipadayag sa labor sector ang wealth tax aron makatigom og pondo para sa social protection ug mga batakang serbisyo. Si Jaime Paglinawan, tsirman sa Bayan Central Visayas, misupak usab sa pagsalig sa kita gikan sa coal ug nanawagan nga unahon ang pagbuhis sa labing adunahang mga Pilipino. (BANAT NEWS)