Lalaki gipusil patay, usa sa mga suspek nadakpan

CEBU, Philippines — Nadakpan sa mga operatiba sa Inayawan Police Station 7 ang usa sa mga suspetsado sa nahitabong pagpamusil sa Sitio White Road, Barangay Inayawan, Dakbayan sa Sugbo, Martes sa buntag, Hunyo 2, 2026.

Giila sa mga awtoridad ang dinakpan nga si alyas “Isaias,” 61-anyos, kinsa giingong usa ka ex-convict ug residente sa maong barangay.  Samtang, gipangita pa ang kauban niini nga giila sa alyas nga “Hienson,” nga taga Sitio Dumpsite sa maong barangay, kinsa naka-ikyas sa pag-aresto.  Base sa report sa kapolisan, nadawat ang taho sa pagpamusil niadtong alas 8:30 sa buntag, Hunyo 1.  Ang biktima giila nga si Orland Ambucas, gibanabanang nagpangedaron og 30 ngadto sa 35 anyos, lumad nga taga Mindanao apan kasamtangang nagpuyo sa Inayawan.

Nakaangkon og daghang samad pinusilan ang biktima ug gidala pa unta kini sa mga responding ambulance personnel sa maong barangay ngadto sa Cebu City Medical Center (CCMC), apan gideklarar kining dead on arrival sa attending physician.  Sa gihimo nga imbestigasyon, usa ka testigo nga wala gipanganlan ang niduol sa mga polis ug nisulti sa iyang nakita.

Base sa iyang estorya, padulong na unta siya mosulod sa barong-barong sa biktima sa dihang nakita niya sila si Isaias ug Hienson nga sunod-sunod gipusil ang biktima gamit ang wala pa matinong armas.

Nagdungan sab nga nanglakaw ang mga suspek padung sa Sitio Dumpsite.  Sa hot pursuit operation sa mga otoridad , ilang nadakpan si Isaias kinsa nasamdan atol kaniya hinungdan nga gidala kini sa Cebu City Medical Center.  Wala narekober sa mga operatiba ang armas nga gigamit sa krimen.

Wala mohatag og dugang detalye bahin sa insidente ang kapolisan sa Inayawan,  ang imbestigador sa maong kaso nibalibad sa pagpa-interview kay naa daw gitahasan para ana, apan ang tawong gitahasan dihang gipangita sa Banat News wala didto.

Padayon nga gipahigayon sa Police Station 7  ang hot pursuit operation batok sa nakaikyas nga suspek, samtang nagapadayon usab  ang imbestigasyon  bahin sa motibo sa pagpamusil. — Paul Benedict O. Sariana ug Cheny R. Labrador, CNU-Main Interns/IBM BANAT NEWS