VP Sara, wala pang desisyon kung tatakbo sa 2028 presidential race

MANILA, Philippines — Wala pa umanong desisyon si Vice President Sara Duterte kung tatakbo nga siya sa 2028 presidential elections.

Ayon kay VP Sara, masyado pang maaga upang magdesisyon ­hinggil dito.

Base rin naman aniya sa mga payo sa kanya, pagsapit ng Disyembre 2026 ay dapat na may desisyon na siya kung kakandidato o hindi sa pagka-pangulo.

Matatandaang sa kanyang mga pagbisita sa mga Filipino community sa ibayong dagat ay una nang sinabi ni VP Sara na seryoso na niyang pinag-aaralan ang pagtakbo sa pampanguluhang halalan sa taong 2028.

Samantala, tiniyak ni Sara na pinaghahandaan na ng kanyang legal team ang napipintong pagdaraos ng pagdinig laban sa impeachment complaint na kanyang kinakaharap sa Senado.

Ayon kay VP Sara, bago pa man maganap ang pag-aresto sa kanyang amang si dating Pang. Rodrigo Duterte ay nabuo na ang legal team na hahawak ng kanyang impeachment.